إجمالي مرات مشاهدة الصفحة

السبت، 11 ديسمبر 2010

رغاي .. وكمان بتكدب ؟!!


جائني يا قراء يا كرام .. أنه وفي احدى الأيام
مخبوطة لما كان عندها 26 سنة .. وقاعدة مرتاحة البال ومتطمنة
سمعت اتصال بين مامتها .. ووحدة ست قريبتها
جايبالها عريس .. بتقول انه محترم ومش تعيس
واتفقت مع ماما على موعد المقابلة
اللي هيقابل فيها العريس اهل مخبوطة
ويشرب عندهم الشاي ابو فتلة


قفلت مامة مخبوطة السكة مع الولية ..
ولقت جرس الباب بيضرب بطريقة هستيرية
فتحت امها الباب
ولقت شاب غريب مانعرفوش
مدهول على عينه وعقله ملطوش


الشاب : السلام عليكم ..
ماما : وعليكم السلام !
- مش ده بيت الدكتور فلان ؟
- ايوة .. مين حضرتك ؟
- انا فلان الفلاني .. كلمتني قريبة حضرتك عن الانسة بنتك


ده العريس !! ..
لسة الموعد بعد يومين ايه اللي جابه دلوقتي ..
ده باين عليه مسروع يا مخبوطة


احد دلالات السرعة اللي عنده انه فضل لازق عند الباب ..
نظام هدخل يعني هدخل
خلى ماما تتكسف وتقوله اتفضل
تلحق نفسها قبل ما يطلب ايدي وهو واقف على السلم


العريس : الحقيقة يا طنط انا سمعت كتير عن الانسة مخبوطة وانا يشرفني جدا اطلب ايدها
ماما : واحنا نتشرف ..
- ممكن اقابلها ؟
- ايوة بس هي عندها صاحباتها دلوقتي معاها في الاوضة وماكناش نعرف ان انت جاي النهاردة ماعملناش حسابنا ...


طبعا ماكانش في حد عندي ..
انا كنت قايمة من النوم ساعتها وعنيا وارمة زي الدبانة
اخرجله واقعد اتاوب في خلقته ؟!


لا لا لا


ما ينفعش خااالص اخرج قبل ما اعمل الطقوس العرسانية اللازمة
ده في سلسلة اجراءات معقدة ومعاملات ودمغات واختام ..
ايه هو فاكر نفسه في امريكا !!
ده انا لسة هستلف من بنات الجيـ .. أأ قصدي يعني هجهز الهدوم اللي هلبسها ...
بعد ما اعمل دراسة جدوى على الدولاب ومحتوياته
واجتماع لبنات العيلة عشان نقرر هلبس ايه
يووووه موال طويل ..


والأهم من ده كله بقى
اني لو خرجتله دلوقتي هيتمرع
آه .. ويقولك دي ما صدقت خبطت على بابها خرجتلي تجري
لاااااا
خليه يتشحتف شوية


- طب شوية بس .. ولو لدقايق !
- أأ.. ما ينفعش كده قدام صاحباتها .. احنا حددنا مع قريبتي موعد عشان تتفضل مع الست والدتك .. وان شاء الله يوميها تشوفها ولو عجبتك ربنا يجيب اللي فيه الخير ..
- والله يا طنط .. انا قلبي ارتاحلكوا قبل ما اشوفكوا ..
- ربنا يخليك ..
- انا يا طنط مش زي بقية الشبان .. لا بدور على بنت صغيرة ولا عندي لستة طلبات ..
( يا سلااااااام ايه التنازل العظيييييم ده ! .. عريس من غير لستة !! .. ياااااه .. هو لسة في عرسان من غير لستة في ايامنا دي ! )
- باين عليك عاقل ..
- انا كل اللي عايزه الستر ..
( ده انت عريس مكسور الجناح كمان ! )
- احنا نتشرف بيك ..
- الشرف ليا يا طنط والله .. طب .. هما صحبات مخبوطة هيفضلوا قاعدين كتير ؟
- هـهـه .. انت عارف قعدة البنات بقى .. عموما احنا منتظرينكوا في المعاد اللي حددناه ان شاء الله
- ان شاء الله .. مع السلامة
- مع السلامة


بعد ما خرج العريس خرجت من الاوضة وسألت ماما :
- هو ايه اللي جابه دلوقتي .. اهبل ده ولا ايه !
- والله منا عارفة .. الظاهر مستعجل
- طب هو شكله ايه يا ماما ؟؟
- هه .. اه .. كويس
- ايه يا ماما هو وحش ولا ايه ؟!
- انا عارفة .. واحد زي بقية الناس .. هو لازم يكون شبه راغب علامة يعني !


انا قلبي مش مطمن
الظاهر ان العريس ده هيكون زي اغلب عرسانك يا مخبوطة ..
منحدر من احدى سلالات الشامبانزي
يا ستي ..
ضل شمبانزي ولا ضل حيطة


وجاء اليوم المنتظر ..
جه العريس ومعاه والدته .. ودخلت اسلم عليهم ..
لفت عيني في الصالون ..
فين العريس ؟! .. انا شايفة ست قاعدة .. وجمبها ولد صغير شكله يدي على 17 سنة
يا نهااااااار !!
هو ده ؟؟؟!!!
ده انا حجمي 3 اضعاف حجمه !!
وايه الأناقة دي !
لابس جينز وكوتش ابيض .. في عريس يلبس كوتشي ؟! وابيض كمان !
ومغرق شعره جل .. قصدي يعني ما تبقى من بقايا شعره


اتارييييك مش عامل لستة


وفوق ده كله
عمال يرغي طول الوقت مع اخويا وما كلمنيش !
من كتر الرغي بتاعه مش فاكرة هو كان بيقول ايه الحقيقة


العريس : رغي رغي رغي رغي رغي رغي رغي رغي
اخويا : ايوة ..
- رغي رغي رغي رغي رغي رغي رغي رغي رغي رغي
- ممم .. مزبوط
- رغي رغي رغي رغي رغي رغي رغي رغي رغي رغي
- فعلا فعلا ..
- رغي رغي رغي رغي رغي رغي رغي رغي رغي رغي


ده مش معبرني خالص
الظاهر اني ما عجبتوش !
عموما يكون احسن .. ده لو صحباتي شافوني قاعدة جمبه في الكوشة هيفتكروا ان ده ابني كان تايه ولقيته ..





وكما هو معتاد
مشي العريس من هنا .. ولبستني حالة النكد من هنا
ايه ده ! .. اتجوزه ازاي ده ؟
لا شكل ولا شخصية ... ولا حتى ذوق !
وانا قاعدة كده بكامل اناقتي .. وما قاليش ازيك !
عمال يرغي مع اخويا وخلاص
قال يعني نظام استعراض غير مباشر قدام العروسة
ومامته .. اول مرة اشوف ام عريس غلبانة كده
ما نطقتش ولا كلمة
معاها حق .. ماهو مش مدي لحد فرصة يفتح بؤه



وبعد هذا اليوم المميز بأيام قليلة ...
اتصلت مرات قريبي اللي جابتلنا العريس الفظيع ده وكلمت
ماما :
- ايه رأيكوا في العريس ؟ كلمني وكان فرحان وقال انها عجبته اوي
( عجبته وما عبرنيش بكلمة اومال لو ماعجبتوش كان هيعمل ايه .. هيرجع على وشي ؟! )
ماما : ...... والله .. مش عارفة اقولك ايه
- ايه ؟
- يا حبيبتي انتي مشكورة طبعا انك بتسعي للخير بس يعني .. الشاب لا شكل ولا شخصية !
- انا عارفة انه متواضع من ناحية الشكل .. لكن مخبوطة بنت عاقلة وهتحكم عقلها !
( متواضع ايه ! ... ده خلصان خالص !!  )
- اكيد طبعا .. بس ماحصلش قبول من مخبوطة .. ولا احنا كمان قبلناه
- خلاص انا هبلغه بقراركوا ده .. هيزعل اوي المسكين
- معلش ربنا يرزقه باللي تناسبه ..


وبعد الموضوع ده باسبوعين .. قريبة ليا تعرف الشاب ده .. كانت قاعدة صدفة مع مرات اخويا وقالتلها :
- انا مستغربة ازاي واحد زي ده يرفض بنت زي مخبوطة .. اتجنن ده ولا ايه ..
مرات اخويا : مش هو اللي رفضها هي اللي رفضته !!
- ازاي ! ده بيقول انه شافها وحس انها بنت معقدة نفسيا منذ الطفولة , وكانت بتبصله بنظرات مسكنة عشان تحنن قلبه و يوافق عليها .. قالك لا دي باين عليها مجنونة ومرضيش يتمم الموضوع !
- ايه !!!!


بقى انت اللي رفضتني يا كداب ! .. وتطلع عليا اشاعاتك الهباب
اني متعقدة منذ الطفولة ... !!
والدنيا عليا مقفولة !

رجالة آخر زمن ..
بيتكلموا ببساطة على بنات الناس
بدون اي تمن

ناسي لما كان لازق عند الباب .. مش عايز يتحتح زي ضلفة الدولاب
ولا منظره بالكوتشي المعفن ..
والشراب اللي طالعة ريحته ومنتن ..

وحطت مخبوطة ايدها على خدها .. بتفكر في العيال اللي بتتقدملها
داعية ربها يخلصها من هذه النوعية
اللي كانت السبب
في الخيبة العربية القوية


ــــــــــــــــــ


انتزروني

هناك 15 تعليقًا:

  1. لا يا مها حررااام عليك انا كنت حروح فيها من ضحك قلب لكحة كنت حموووت ايه سلالة الشمبانزي و ظل شمبانزي و لا ظل حيطة هههههههههههه بتجيبي الكلام ده منين لا و التانية ابنك اللي تايه و لقيتيه
    انت فزيعه الاضافات عاملة جو جنان ايوة عايزين نستغل حالة الروقان الفكري ده خلصي الحكايات كلهم يا بت و اتحفينا تحياتي يا كبييير

    ردحذف
  2. هههههههههههههه
    اضحك الله سنك يامها ظل حيطه ولا ظل شامبنزي
    ربنا خلصك من الاشكال دي
    انابفضل ان البنت تقعد من دون جواز ولاتتجوز اشكال زي دي

    ردحذف
  3. ههههههههههههههههههههههههههههههههه

    الاسلوب جميل وفكاهى جدا الحقيقة واهو معلش خدوهم بالسوط لا يغلبوكم

    تحياتى

    ردحذف
  4. سلام

    هايل يا مخبوطة، الإضافات جميلة

    فعلا زي ماكون بقراها لأول مرة

    عريس خفشاري ومن النوعية الشمبوزية كمان

    ربنا يهدي

    ردحذف
  5. واضح طبعا ان هو اللي معقد

    ماقدرش يستحمل ان حد يرفضه

    :))

    ردحذف
  6. هو طبعا إتجرحت كرامته مفيش كلام يا شمس

    بس الشكل خلقة ربنا يمكن لو كان عنده شخصية ومالي عين مخبوطة

    كان موضوع الشكل يمشي

    انما يكون الواحد لا شكلا ولا خلقا صعبة دي مو ؟

    ردحذف
  7. ههههههههههه
    جميلة يا مخبوطة
    بس أحلى حاجة الكوتش الأبيض
    هههههه
    تسلم أيد على القصة الجميلة
    لك حبى وودى

    ردحذف
  8. هههههههههه

    جميله يا مخبوطه ودمها خفيف فعلا

    وإسلوبك جميل

    رغم ان فيه مدونات تناقشت عن فكرة الزواج

    بس اسلوبك القصصى على طريقة شهرزاد جديده وجميله

    متابعه يا قمر جديدك ان شاء الله


    ملحوظه ضغيره

    هو مش فيه لون غير اللبنى ده؟؟

    أصل أختك تعبت قوى على ما قريته عشان فاتح زياده عن اللزوم :)

    ردحذف
  9. لاحول ولاقوة الا بالله ... الاشكال دى بتيجى منين ؟؟؟؟ مش عارفة ..... امال فين الرجالة الحقيقين ؟؟؟؟ راحو فين ؟؟ هى الرجولة انك تطلع اشاعات على البنات ..... بس علشان رفضتك ..... تقول عليها مجنونة ..... بجد شر االبلية مايضحك ... ربنا يكون فى عونك يامها ....

    ردحذف
  10. ههههههههههههههههههههههههههههههههه


    والله انتي عسل موتيني من الضحك

    طلع عليكي اشاعه انك انتي اللي رفضتيه هههههههههههههه


    كنت اتجوزيه وربيه تكسبي فيه ثواب هههههههههههههه


    في انتظار عرسانك يا عروسه ههههههههه

    ردحذف
  11. صبح وريحانة ومفقوووصة ههههههه ايه رأيكوا ... يارب دايما تضحكوا .. وانتزروني ده انا ناوية اجيب كل حديقة الحيوان هنا ههههههه .. منورين فيري متش

    ردحذف
  12. شمس النهار والاخ فوكسولوجي وسلسبيل ومها البنات ميرسي على مشاركتكم انا مبسوطة ان الحلقة نالت اعجابكم اهلا بيكم منورين يا جماعة والله

    ردحذف
  13. مفقوصة معاكي حق طبعا انه ما يكونش شكل ولا شخصية بيبقى صعب اوي لأن الوحدة نفسها تفرح لما تتجوز وتعيش مع انسان عاقل له شخصته

    ردحذف
  14. د. بيري منورة يا قمر ... احنا في زمن اصبحت فيه الرجولة في خطر .. لو كان في رجال كتير بمعنى الكلمة ماكناش شفنا ازمة تأخر زواج البنات ... الناس فاكرة ان متأخرات الزواج ما اتجوزوش عشان وحشين ولا اخلاقهم وحشة ولا مش لاقيين حد يعبرهم ..
    والحقيقة انهم مجرد بنات بيحاولوا يحسنوا اختيار الزوج
    ولما تحاول تحسن اختيار الزوج في وسط مجتمع لا يرحم والزوج الصالح بقى فيه قليل .. اكيد وبلا شك هيكون مصيرها ان جوازها يتأخر .. ولا حول ولا قوة الا بالله

    ردحذف
  15. اهلا يا دكتورة ولاء يارب يديم عليكي الضحكة ... منورة

    ردحذف

back to top إخبط لفوق