إجمالي مرات مشاهدة الصفحة

الجمعة، 10 ديسمبر، 2010

عريس .. ولا جزمجي ؟!!


جائني يا قراء يا كرام .. انه وفي احدى الايام
قاعدة في الاوضة البت مخبوطة
لما دخلت عليها مرات اخوها .. 
اللي كانت منشكحة ومبسوطة


مرات اخويا : قومي البسي بسرعة ..
انا : في ايه ؟
- وحدة ست ومعاها بنتها بيسألوا عنك عايزين يخطبوا ..
- بجد ؟
- آه يلا بسرعة ...
- وايه اللي جابهم فجأة كده !!
- لا هو مش فجأة هما واخدين معاد من يومين ... بس ما حبيتش اقلقك عشان لو عملوا فينا زمبة وماجوش ما تزعليش
- انتي تعرفيهم ؟
- يعني .. مش اوي .. جيران صاحبتي .. يلا بقى يا مخبوطة ما تتأخريش !!


( وفتحت الدولاب .. تلبسي ايه يا بت يا مخبوطة تلبسي ايه )
انا : البس ده ؟
مرات اخويا : لا ده بتباني فيه تخينة ..
- ممم ... طيب ده ؟
- ايه يا مخبوطة ده قديم من السنة اللي فاتت !
- ايوة بس حلو ..
- اه حلو انما تلبسيه ليه وفي عندك اللي اجدد منه ؟!
- عشان ببان فيه رفيعة ..
- لالا .. بصي .. البسي القميص ده ..
- ده ؟؟ ده قميص نحس !! عمري ما لبسته لوظيفة واتعينت .. ولا لعريس واتنيلت على عيني اتخطبت !
- نحس ايه بس ... القميص ده بالذات فيه كل المواصفات اللازمة .. البسي البسي يلا اتأخرنا


كلام مزبوط ..
لازم وانتي خارجة تقابلي الست كونداليزارايس العرب
( ام العريس )
تكوني اجدعها عارضة ازياء
لو مليانة .. لازم تخسي ساعتها ..
ازاي معرفش
لو رفيعة اتخني .. بأي طريقة .. بأي شكل ..
لو سمرة تبيضي .. لو بيضا تسمري
قصيرة تطولي .. اقلبي كوباية وحطيها تحت كعب الجزمة
لو طويلة زيادة ...
اااااااه دي صعبة شوية
بصي شوفيلك اي طريقة تقصري بيها .. حاولي تتصرفي
اعملي بحث في جوجل عن الحكاية دي ممكن يساعدك
اعملي كل اللي تقدري عليه .. واللي ما تقدريش عليه
يا بنتي ده يوم فاصل ما بين العنوسة والزواج ..
يعني يا قاتل يا مقتول

مرات اخويا : ايه ده مش هتحطي ميك اب ؟
- منا حاطة اهو !!
- هو فين ؟
( وقربت مرات اخويا عليا ولزقت وشها في وشي .. تبحث عن بصيص الوان تضيئ بشرتي اللي صبغها المجتمع الندل باللون الاصفر .. ومسكت قلم الروج ..)
- حطي يا بنتي حطي .. ماهو انتي ما تعرفيش صاحبتي تعبت قد ايه عشان تجيبلك العريس ده ..


ودخلت مخبوطة الصالون ..
بعد ما تأكدت ان اللوك بتاعها مية مية
وألقيت على ام العريس والمحروسة بنتها نظرة سريعة
ايه المناظر دي !!
ايه يا ولية طب البسي حاجة معقولة !! .. طب اغسلي وشك !! ...يمكن غسلته وهو شكله كده ؟
تعبت نفسي على الفاضي
بقى هما دول اللي قلبت الدولاب عشانهم ؟!!


يا بت يا مخبوطة .. ما تنسيش ان موازين القوى اختلفت
زمان .. كان في قطبين جاذبين ..
معسكرين
معسكر العريس اللي بيتمنى العروسة بنت الناس المحترمين
توافق عليه ..
ومعسكر العروسة الدلوعة اللي نفسها تتجوز وتلبس الفستان الأبيض .. وتوافق من قلبها ..
مش اضطرارا ولا هربا مما هو اسوأ


انما النهاردة .. بعد انهيار معسكر اهل العروسة
وهيمنة معسكر اوحد .. وهو اهل العريس
بحكم ارتفاع عدد متأخرات الزواج وما يرافقه من ارتفاع لسقف طلبات العريس .. خصوصا بعد انتشار عمليات التجميل والشفط والنفخ ...
وهبوط سقف طلبات العروسة .. بعد ما بقى كله عواطلي وبيشرب حشـ ... أأأ .. رد بول


عشان كده يا بت يا مخبوطة
انتي البسي اللي على الحبل واعملي في نفسك البدع
وكتر خيرهم لو عبروكي
هما بقى يلبسوا جلابيات نايلون .. يلبسوا صفيحة نيدو قديمة ..
مش مهم
ييجوا ويقعدوا ويحطوا رجل على رجل
ويتفرجوا عليكي ويقلبوا فيكي زي البتنجانة



ام العريس : ازيك يا امورة
انا : الحمدلله يا طنط
- بسم الله ما شاء الله ربنا يحفظك
- ميرسي


اخت العريس : انتي خريجة كلية ايه ؟
انا : اقتصاد وسياسة
ام العريس : انا ابني خريج ادارة اعمال .. بس دلوقتي انتي عارفة الظروف مش لاقي وظيفة عدلة وقاعد من غير شغل ...
ماما : الظروف دي على الكل .. وابنك عنده كم سنة ؟
ام العريس : 30 .. والامورة ؟
ماما: مخبوطة 28 ..

وجحظت العيون ... وكبتت الأنفاس
وبصت ام العريس لبنتها وبنتها بصت لها وكأن الصاعقة نزلت عليهم ...


ام العريس : معقولة ؟؟؟
اخت العريس : يااااااااااااااااااااه !!!


( هي القيامة قامت ولا ايه )


ام العريس : والله افتكرتها بالكتير 22 .. مش باين عليها خالص !
ماما كشرت : والانسة بنتك عندها كم سنة ؟
- 27
انا لأخت العريس : انتي متجوزة ؟
- لا
( اومال مالك يختي اتخضيتي ليه لما عرفتي عمري ! ... ما انتي متنيلة على عينك زيي !! )
ماما : يعني من سن مخبوطة !
ام العريس : يا حبيبتي هو احنا قلنا حاجة .. ان شاء الله خير بنتك بسم الله ما شاء الله مفيش احسن من كده .. ربنا يتمم على خير ..
ماما : ان شاء الله ..


وخرجت ام العريس وبنتها ..
اخر مشهد ليهم قبل خروجهم من البيت .. انهم كانوا مبتسمين
وبيقولوا ان شاء الله خير
وان البت مخبوطة .. فتاة عالية الجودة


طيب .. لعله خير


بعد يومين
دق جرس الباب ... ودخلت الست وبنتها في الصالون
وجتلي مرات اخويا تجري


مرات اخويا : دول هما يا مخبوطة .. بصي مادام رجعوا بنفسهم تاني .. يعني اكيد عايزين يتمموا الموضوع
- تفتكري ؟
- ايوة طبعا .. اصل لو مفيش نصيب هيرجعوا تاني ليه ويعملوا زيارة تانية !
- ممكن برضو
- ما تنسيش صاحبتي من الحلاوة لما الخطوبة تتم .. هي اللي سعتلك في الحكاية دي
- مش لما يتم الاول !
- لا انا حاسة ان المرة دي مش زي كل مرة ..  
( مممم .. مادام قلتي كدة  .. يبقى الموضوع هيبوظ هيبوظ )


- بصي البسي وجهزي نفسك احتياطي .. لحد ما اروح اتسنط على كلامهم
- اووووكي


وراحت مرات اخويا وقفت جمب الصالون تسمع
بينما وقفت انا قدام الدولاب بحاول اتفاهم معاه
على اللبس المناسب للزيارة التانية
ولكن قطع علينا وصلة التفاهم دي مرات اخويا اللي رجعت
بعد دقايق و وشها أصفر


- مخبوطة .... خلاص .... مفيش داعي تلبسي
- ليه في ايه ؟
- الظاهر في اعتراض على السن !
- ....  


وراحت مخبوطة ومرات اخوها تاني
يسترقوا السمع
ويطربوا نفسهم على نغمات يعزفها مجتمع رجعي ..
وندل


ام العريس لماما : والله يا حبيبتي مش عارفة اقولك ايه .. الولد مارضيش .. قال 28 كتير اوي
ماما : ليه يعني ماهو اكبر منها !
- والله قلتله البنت كويسة تعالا معايا شوفها وبعدين قرر ابدا مارضيش .. قالي لو كانت 26 ممكن انما 28 لا !
ماما : .......
مرات اخويا : .......


( قلتلكوا من الأول ان القميص ده نحس .. محدش صدقني )


هو العريس عايز وحدة يتجوزها ؟؟ ..
ولا جزمة يشتريها ويلبسها ؟؟
26 مقاسه انما 28 يهملها


حست مخبوطة بتحقير لانسانيتها .. واهانة لمكانتها وآدميتها
فوق ماهو واد عواطلي .. عامل فيها الفيس بريسلي
يا شيخ اتلهي .. وعن وشنا انتهي
مليتو البلد ..
كل واحد بيدعي انه راجل .. وهو في الاصل ولد
هو ايه اللي ضيع فلسطين .. الا شوية الشبان المتدلعين
اللي فاكرين نفسهم شطار
وهما بالاساس خايبين


وحطت مخبوطة ايدها على خدها ... بتفكر في الاشكال اللي بتتقدملها
داعية ربها بقلب مجروح ... على كل ظالم وياخد منه الروح
ويريح الامة العربية ..
من كل الشباب اللي كان السبب
في خيبتنا الخيبة القوية


ــــــــــــــــــــ


انتزروني 

هناك 16 تعليقًا:

  1. والله العريس ده عمل طيب ومشي بدري بدري بدل ما يقرفك ويتعبك معاه زي اللي فاتوا واصلا واحد بالعقليه المتخلفه دي فعلا مكانش يناسبك...
    لاهو ولا اهله وحتي لو تم الجواز كنتي هتتعبي قوي معاهم
    وصدق الله العظيم
    (وعسي أن تكرهوا شيئا وهو خير لكم)

    ردحذف
  2. كتير حلوة مدونتك! وجد كتييير عجبتني هالعبارة:
    26 مقاسة انما 28 يهملها

    بيحزن وضعنا احنا العرب،رح نضل نشيّء المرأة و نحمّل الناس جمسلة انها معزّزة مكرّمة ليوم الدين
    لا والله ما هي معزّزة و لا مكرّمة...الا اذا كانت ملكة جمال و غبية كفاية انها تحط نفسها بمكان يقيمها فيه الرجل!

    ردحذف
  3. طبعا دمك خفيف

    والموضوع مافيهوش ملل

    وبيعكس قد ايه المجتمع بقا غريب
    جايه تخطب لشاب في 30 من عمره ومااشتغلش
    ازااااي بقا
    وان شاء الله هيصرف منين علي الزواج
    ومصاريف البيت

    ام العريس فرستني بصراحه
    :))

    ردحذف
  4. واخييييييييييييرا بشارك في المدونه معلش جت متاخر
    بس المهم اني وصلت
    الف الف مبرووك يامها المدونه تحفه وقميله جدا

    ردحذف
  5. كان الله في عونك أختي..

    لكن، كل شيء فيه خير.. المهم الصبر..

    سعيد أني كنت هنا..

    ردحذف
  6. بنفسج صح كلامك العريس ده باين عليه من قبل ما اشوفه انه ماي ل ينفعش .. والحمدلله على كل حال .. ميرسي لتعليقك ياقمر

    ردحذف
  7. راين اهلا بيكي والله كلامك في محله .. الاسلام كرم المرأة لكن المسلمين ما كرموهاش ولا حاجة .. اللي بيتعاملوا مع بنات الناس وكأنهم جزم بمقاسات .. استغفر الله العظيم لكن هنقول ايه .. لو امهاتهم ربوهم ماكانوش طلعوا كده ... امه علمته انها جزمة وان اخته جزمة عشان كده شايف كل البنات جزم اللي بيفرق بين الجزمة والتانية الموديل بتاعها ...

    مش عارفة بيختار زوجة وام لاولاده على اي اساس ...

    ردحذف
  8. شمس النهار ... انا اللي فرسني اكتر العريس .. يعني الام وممكن نقول القرد في عين امه .. انما هو طالع فيها وهو مش لاقي شغل واهله همااللي هيجوزوه ويصرفوا عليه وعلى مراته ...
    هوالمفروض اني ازغرت في عبي بقى انه جالي وعبرني مع انه فيه العبر .. لمجرد ان هو الراجل وانا البنت

    ردحذف
  9. اهلا بيكي يا ريحانة ... الله يبارك فيكي ... انتي مين يا ريحانة هناك ؟

    ردحذف
  10. اهلا بيك يا اخ خالد .. متشكرة لانضمامك ومتابعتك للحكايات .. ربنا يكرمك

    ردحذف
  11. زوزو منورة المدوووووووونة

    ردحذف
  12. واضح ان العينه واحده
    بس اعتقد ان مامته انسانه كويسه لانها جات اعتذرت بنفسها
    ربنا يكرمك

    ردحذف
  13. انا سميه يا مها ايه ده انت لحقتي تنسيني معلش الله يكون في عونك هو للي شفتيه من الغربان دول شوي
    بجد يامها اسلوبك رائع ربنا يوفقك يارب

    ردحذف
  14. شيء يفقص بصراحة

    ميشوفك الأول ويعرف شخصيتك و بعدين يقرر يقبل ولا يتنيل

    انما كده رفض وبحجة أنه لو كان سنك أصغر شوية

    يبقى ميستاهلش أبدا الزعل عليه يا مخبوطة

    في ستين داهية وأكيد هو الخسران

    ردحذف
  15. ماشاء الله يا مخبوطه اضافات جميله للقصص كاني اقراها لاول مره ....ابداع كالعاده في الوصف وخفه الظل ....كان الله في عونك على تلك العينات الغبيه المنحدره من سلاله الزواحف هاهاهاها على فكره يا مخبوطه انتي خساره فيهم دول كبيرهم يتزوجوا واحده مخلصه ابتدائي لانه تفكيرهم رجعي ولا يمت للاسلام باي صله ...اين اظفر بذات الدين ..؟؟؟واين هؤلاء الشباب المتواكل من رسولنا وحبيبنا صلى الله عليه وسلم عندما تزوج سيدتنا خديجه رضي الله عنها ولم ينظر صلى الله عليه وسلم لفارق العمر بالرغم من انها كانت تكبره باعوام كتيره وليست اصغر منه ....اين ما علمنا اياه الدين عن اسس اختيار الزوجه الصالحه ....للاسف يا مخبوطه طول ما احنا بعاد عن الدين سنبقى نتردى اكثر وحتكون اسرنا فاشله والاجيال اللي حتطلع حتكون عديمه الفائده وعمرنا ما حننهض ونرتقي ربنا يسهلها ويعدل الحال لان الامه بجد في تدهور ...
    اما انتي يا مخبوطه ربنا حيعوضك خير لانك انسانه نظيفه وشفافه وبتعرفي ربنا ....

    ردحذف
  16. هههههههههههههه

    فعلا ده واضح انه عايز مقاس جزمه على وشه

    ايه 26 من 28

    والله تفكير غبي

    الله يكون في عونك يا بنتي على البلاوي دي

    ردحذف

back to top إخبط لفوق