إجمالي مرات مشاهدة الصفحة

الأربعاء، 15 ديسمبر، 2010

الحادثة !!


جائني يا قراء يا كرام .. انه وفي احدى الايام
حتة موقف حصل
من خطيب مخبوطة
اللي كان كاتب كتابها وعنها وانفصل


تررررن تررررن .....


- آلو .. مخبوطة
- ايوة
- انا مش هاجي عندكو في الويك اند ..
( بجد !!! )
- خير في حاجة ؟؟
- هطلع رحلة انا وصحابي يومين كده
- مع الف الف سلامة


خطيبي ده .. الدكتور البخيل اللي قبل كده اتكلمنا عنه
كان طالب دراسات عليا مغترب بعيد عن اهله ..
وبعد ما كتب كتابي
اهلي حبوا ينتشلوه من الوحدة والضياع
فقالوله الجملة اللي جابت لمخبوطة الكافية وقلة العافية
البيت بيتك يا ابني واحنا اهلك في الغربة
خطيبي بقى
استغل الوضع ده استغلال اكسترا
كان بييجي خميس وجمعة يبلط عندنا ..
اصل الايام دي اجازة فرصة اجي افسح مخبوطة وافرسها
وشوية شوية
بقى ييجي سبت واحد ..
اصل الايام دي مفيش محاضرات مهمة
وتلات واربع ..
اصل البروف بتاعنا وهو خارج من المحاضرة وقع على السلالم ورجله اتلوحت وهو دلوقتي في العناية المركزة


ده مابقاش يبات في سكن الطلاب غير ليلة او ليلتين في الاسبوع
وطول ماهو عندنا وهو حابسني جمبه ..
ده انا بقيت اقوم اصلي منه بالعافية !!
قاعدلي وماسكلي في ايدو ساعة العداد وبيحسبلي وقت الصلاة بالدقيقة ..
ولو اتأخرت خمس دقايق تبقى وقعتي سودة
ايه كل ده بتصلي ؟! .. ما تنامي احسن !!


لحد ما البت مخبوطة بقت تفكر بشكل جدي انها تخلص عليه
سندوتشين فول مسمومين وكله يبقى تمام


انا : آلو .. باسم ..
هو : ايوة يا مخبوطة ..
- انا هخرج مع صاحبتي يوم الخميس اتفسح شوية
- اااااااه .. ده انتي ما صدقتي بقى !!
- ما صدقت ايه انا ما شفتهاش من يوم كتب الكتاب !!
- طب ما تروحي تزوريها في البيت ولا هي تجيلك !! .. لازم يعني تخرجوا !!
- انا زهقانة من الحبسة وعايزة اخرج !! .. اشمعنى انت يعني هتخرج رحلة مع صحابك يوم الخميس !!
- يا ماما انا خارج مع رجالة مفيش معانا بنات ! .. انما انتي صحبتك دي هتتفسحي معاها ازاي ! هتركبوا تاكسي ؟ ولا المحروس اخوها اللي هيفسحكوا بعربيته ؟؟
- لا ده ولا ده .. هي هتيجي بعربيتها تاخدني ومحدش هيكون معانا .. كويس كده ؟
- وهتروحوا فين ؟؟
- لسة مش عارفة ..


خطيب مخبوطة كان هيتجنن عشان هي خارجة مع مخلوق آخر غيره ...
كان بيكره صاحباتها واخواتها البنات وعيالهم كمان ...
كان نفسه يخليها تقطع علاقاتها بكل البشر اللي عرفتهم في حياتها ..
بما فيهم امها !!


ولكن في النهاية ... انتصرت البت مخبوطة
وجت صاحبتها بعربيتها الشيك وخدتها وخرجوا لفسحة متنوعة في اماكن متعددة
وكالعادة .... السعادة لا تكتمل ...
خطيب مخبوطة كان يعكر تلك الاجواء باتصالاته وتحقيقاته


ترررن ترررن
- انتوا فين دلوقتي ؟ ..
ترررن ترررن
- هتروحي امتى ؟
ترررن ترررن
- ابقي افتكريني بمسج يختي ..


لدرجة ان مخبوطة عيطت وهي برا
وصعبت على صاحبتها اللي اتفاجئت من تصرفات خطيب مخبوطة !
معقولة في حد كده ؟!
ومن كتر مفاجئتها باللي حصل سرحت وهي سايقة وعملت حادثة خفيفة ...
خبطت واحد راكب عجلة ووقع على الارض ...
هو ما حصلوش حاجة
لكن كما هو متعارف عليه في بلادنا العربية
لما واحد تخدشه عربية في الشارع بيستغل الحادثة اللي نزلت عليه من السما دي
ويعمل فيها شهيد
وعايز تعويض وعلاج ونسدد ديونه ونجيب لعياله كسوة المدارس ونسفر امه للحج و و و و ...
كل ده وهو واقف على رجليه سليم زي الددبان


انشغلت مخبوطة مع مشكلة صاحبتها ونزلت من العربية وسابت الموبايل جوة ..
وخطيبها عمال يرن كل خمس دقايق وهي مش سامعة ...
لما انتهت المشكلة وروحت مخبوطة البيت شافت المكالمات والمسجات بتاعته ..
اتصلت بيه يمكن يكون حصلتله مصيبة هو كمان


- آلو ..
- انتي فين ؟ ساعتين كاملين وانا بتصل كنتي فييييييين ؟
رديت عليه بقرف : حصل موقف معايا انا وصاحبتي فانشغلت معاها وما خدتش بالي من الموبايل ....
- موقف ايه ؟
- عملنا حادثة  
- ايه ؟؟؟ .. بتتكلمي جد ؟؟؟ ... هاهاهاهاهاهاهاهاهاهاها
هااااااهاهاهاهاهاهاهاااا ... هاااااهاهاهاهاهاهاهاهاااااا
- انت بتضحك على ايه ؟
- ادفع نص عمري واشوف منظرك ساعة الحادثة كان عامل ازاي !
( اه يا عديم الذوق والاحساس ! .. ده بدل ما تقولي انتي كويسة ولا لا .. ده بدل ما تقولي سلامتك !! شمتان ان الخروجة بتاعتي ختمت بمصيبة ؟!!! )
- باسم ...
- نعم ..
- انت شارب حاجة ؟؟؟؟؟


وقلبت بخناقة كبيييييييييييرة
وزي ما اتعودتوا من مخبوطة الذكية
حاولت استثمار الخناقة دي ..
وقفلت الموبايل يومين عشان ترتاح من خطيبها
اللي كان بيتصل على اختها المتجوزة زي المجنون يطالب بأن تفتح مخبوطة الموبايل بتاعها ....


اختي : خطيبك ده جنني .. بيتصل بيا الساعة 1 بالليل .. و4 الفجر .. والصبح .. والضهر .. والعصر .. ايه ده هو مش عارف اني ست متجوزة !!!!
انا : عشان تعرفوا العذاااااب اللي انا عايشة فيه !


ولما فقد خطيب مخبوطة الأمل من انها تفتح الموبايل تاني ..
طب عليها في البيت عشان يصالحها ..
ويعزمها على مطعم السمك اياه ..
ويشربها شوربة العدس بالبصل ذو الرائحة النفاذة ..
كتعويض عن يومين الخصام اللي فاتوا


لبست مخبوطة وراحت لخطيبها اللي كان واقف بيستناها عند الباب ..
عشان يفسحها الفسح الفقرية بتاعته


 
خطيبي : ايه الشياكة دي ..
- ميرسي
- مخبوطة بقولك ايه .......
- ايه ؟
- ما تقولي لصاحبتك تسلفنا عربيتها نتفسح بيها
- نعم ؟!!



وخلال اجزاء من الثانية ... اتخانقت مخبوطة مع خطيبها
خناقة تانية
عشان رفضت تستلف من صاحبتها العربية .. وقالتله ما تستلف انت من صحابك ..
انا مش بنت شحاتة و هفية


ازاي بيعاملونا بطريقة مافيهاش احساس .. وبيطلبوا مننا
حنية ورومانسية من الاساس


ويقولي يا بنت الناس كلميني كويس .. وهو عمال يكلمني باسلوب مهيس
ده غير خروجاته المزعجة ... وحركاته ومقالبه المحرجة


وحطت مخبوطة ايدها على خدها .. بتفكر في اسلوب خطيبها اللي هدها
داعية ربها ساعة فجرية .. يخلصها من هذه الخطوبة الفقرية
اللي كانت السبب
 
في خيبة مخبوطة .. الخيبة القوية


ـــــــــــــــــــــ


انتزروني
 




هناك 12 تعليقًا:

  1. التربيه التربيه التربيه
    عايزة افضل اقول كده حتي اخر العمر

    تربية الاولاد من الصغر
    الام والاب مسؤلين عن العرسان المشوهين دول

    ولسه ياما هنشوف

    ردحذف
  2. دي جديدة دي انا مش فاكرة اني قريتها

    تعليقي على الشخصية دي

    انو حاجه من اتنين يا عبيط يااا عبيط

    ردحذف
  3. ربنا معاكى يا مخبوطة
    تسلمى على القصة الجميلة
    دى سلمت أناملك غاليتى
    تحياتى لك و حبى

    ردحذف
  4. سلام

    باسم يا باسم فينك يا ممطوطة عشان المط يزيد نيهاا

    برافو يا مخبوطة، تحسي كدة زيي ماقالت البت صبح أنك أول مرة تقري الخيبة دي

    لو مكنتش فاكرة الحادثة كنت قلت أنها جديدة الخيبة دي

    انما أظن أنك شلت منها حاجة صح ؟

    ممممم الجواب هناك :)

    ردحذف
  5. اللهم سلم من أمثال هؤلاء

    أبدعتى يا مخبوطه

    حقيقى ... برافو

    ردحذف
  6. شمس النهار منوراني .. وانا اؤيد كلامك 100% .. دلع الام للولد هو اللي خرجلنا الاشكال اللي تعبتنا دي .. ربنا يصلح الحال

    ردحذف
  7. صوبحووووو قهلا قهلا .. الحلقة دي اتكتبت من اوائل الحلقات بس كانت مختصرة كده ومالهاش طعم .. انا زدت عليها بعض التفاصيل عشان تبقى مفهومة اكتر .... والشخصية دي .. فعلا عبيطة .. وبتستعبط في ذات نفس التايم

    ردحذف
  8. سلسبيل ومها البنا ميرسي لتشجيعكم ومشاركتكم الجميلة ... منورين المدونة

    ردحذف
  9. مفقوصة قهلا قهلا ... لا تقريبا ما شلتش حاجة مهمة ولكن ضفت عليها حاجات مهمة ... بعض تفاصيل كنت ناسياها لما كتبتها اول مرة ... وبالمرة اشجع اللي قروها اول مرة هناك في الموقع يقروها تاني ويحسوا انها جديدة ...
    اما البت ممطوطة ... الوييييييييييييل لها

    ردحذف
  10. ده معندوش ذوق نهائي

    في انتظارك يا مخبوطه

    ردحذف
  11. الحمد لله الذى عافانا :))))))

    الصبر مفتاح الفرج والله

    تحياتى

    ردحذف
  12. مخبوطه سلمت يديكي اضافات حلوه بجد كاننا نقراها لاول مره ....عارفه يا مها الاشكال دي بتكون مش شبعانه في بيت اهلها يعني عينهم فارغه بيحبوا يمتلكوا كل شيء ويستغلوا اللي حواليهم عاطفيا وماديا ونفسيا وبيوصلوكي لدرجه الخنقه ....واهلك عملوا باصلهم لكن هو الظاهر كان فاكر غير كده فقال فرصه وجت الحمد لله انك خلصتي منه لانه معقد وما عندوش ثقه بنفسه لانه لو حاسس بنفسه راجل مكتمل كان اعطاكي مساحه من الحريه تشوفي فيها اصحابك واخواتك وتخرجي لكن هو عارف نفسه عنده نقص علشان كده خايف على اجتماعك باي حد لحسن ينصحوكي او ينتقدوه عموما في الانتزار يا مبدعه

    ردحذف

back to top إخبط لفوق