إجمالي مرات مشاهدة الصفحة

الأربعاء، 8 ديسمبر 2010

خطوبة 4





جائني يا قراء يا كرام .. أنه وبعد ان حصلت مخبوطة على الطلاق ..
بدأت حياتها تزداد سواد .. بعد ان عصفت بها الخيبات الشداد


عرسان خايبين ومن السطوح واقعين ..
خصوصا .. بعد ما مخبوطة
عدت التلاتين
وحصلت على اللقب البائس ..
من وزارة تلقيب العوانس
اللي بتطلق القاب مخزية .. على كل امرأة حزينة ومبتلية




ام العريس جت ...
- والله يا جماعة بنتكوا ما تتعيبش .. بس الولد لما عرف عمرها ما رضيش وقال انا عايز وحدة اصغر , قلتله يا ابني تعالا شوفها بس .. قالي لا يا ماما ما اتجوزش وحدة في السن دي مش عايز اشوفها

ومواقف معكوسة :
تررن تررن
- آلو ... مخبوطة
- ايوة يا بشمهندس
- ماما .... هي بتقول انك كويسة وكل حاجة بس .. يعني ....
- سني مش عاجبها مش كدة ؟
- لا هو مش بالزبط .. هي قصدها ان موضوع الخلفة هيكون ...
- خلاص فهمت .. مع السلامة


وفي وسط هذه المعمعة التي تتخبط فيها مخبوطة

تررررررررن تررررررررن

انا : آلو .. أهلا ازيك عاملة ايه ؟
هي : راجل مطلق مراته جديد .. 39 سنة .. رتبة مقدم في الشرطة , سألني عنك .. ويطلب تحددوا معاه معاد ييجي يزوركم في البيت ... اقوله ايه ؟
- ما تعرفيش عنه حاجة تانية ؟ .. شخصيته عاملة ازاي ؟
- انا اتعاملت معاه شوية في حدود الشغل .. والله اللي شفته انه محترم اوي .. مقتدر مادياً .. تفكيره متفتح .. وظريف جدا ودمه خفيف ..
- بجد دمه خفيف ؟؟؟؟؟؟؟؟؟؟؟؟؟؟؟
( صفة افتقدتها بشدة في كل اللي اتقدمولي واتخطبتلهم قبل كده .. كانوا يعزوا النكد زي عنيهم )
- اللي اعرفه لما كنا بنعمل شوية شغل معاه كنا طول الوقت هنقع على الأرض من كتر الضحك ..
- وااااو ! ... طب ما تعرفيش طلق مراته ليه ؟
- بصراحة لأ .. بس اسمع انها كانت ست مفترية
( عريس الاحلام وصل يا جدعان )
- طب اوكي هكلم بابا ولما نحدد معاد مناسب هبقى اتصل بيكي .. سي يو

كلمت مخبوطة باباها وحددلها موعد عشان تيجي ام العريس تشوفها وبعدين ييجي هو يشوفني حسب التقاليد الحمضانة

هي : آلو .. مخبوطة
- ايوة
- الراجل كلمني .. وقال انه هيجي بنفسه ومش هيجيب معاه حد.. لأن هو اللي هيتجوز مش مامته .. قال انه مش صغير على الكلام ده

والله برافو عليه .. كتير اوي بتيجي الستات تبوظ الموضوع قبل ما يبتدي ... بعد ما بقينا في زمن الام فيه بتدخل في ادق التفاصيل وابنها قاعد جمبها زي التلميذ ..
شوية شوية يحط صباعه في بؤه ...
يا جماعة .... انا ابتديت اعجب بشخصية الراجل ده


وجاء اليوم المنتظر


مرات اخويا : البسي حاجة محزقة .. حطي مكياج فتاك .. انتي ما بتشوفيش البنات بيعملوا في نفسهم ايه لما ييجي عريس ..
- ما بحبش المبالغة
- انتي فاكرة نفسك في فرنسا ؟ ... الناس هنا ما بيفهموش الكلام ده .. الناس هنا بتيجي تتفرج على عروسة المولد المتزوقة .. مش على أدب البنت وأخلاقها .. !


وجهزت مخبوطة على سنجة 1000 ...
بقى عندها عاهة نفسية عايزة تغطي عليها .. وهي سنها .. ما بقتش صغيرة وواثقة من نفسها زي زمان ..
بسبب المجتمع الندل
ولأنها اقتنعت ان الناس مش بتبص على العقل ولا بيفهموا في الذوق .. بقت عايزة تاخدهم على قد عقلهم .. عشان تتجوز وتعيش زي بقية البنات

و دخلت مخبوطة الصالون ..

- السلام عليكم ...
العريس وقف : وعليكم السلام ورحمة الله ... بسم الله ماشاء الله
ده انت اللي بسم الله ماشاء الله .. في بيتنا رجل وسيم ! .. طول بعرض وعضلات ! .. ساحر النظرات جميل الابتسامة .... علامة الصلاة واضحة على وشه ..
شكله كده يدي على راجل محترم

العريس : ازيك يا انسة مخبوطة ؟
انا بصوت متردد : الحمدلله ..

العريس بص لمخبوطة .. وسرح .. انا بخاف اوي من اللي بيسرحوا دول .. اوي

بابا : ايوة كمل يا ابني .. قلتلي والدك توفى امتى ؟
العريس فاق من سرحانه : هه ؟ .. آه .. توفي سنة 2005 ... قصدي 1995 .. لا لا .. آه صح صح 1995 ..

مخبوطة شافت منظر العريس وهو متلخبط في تاريخ وفاة والده وماقدرتش تمسك نفسها من الضحك ... عبيط ده ولا ايه !
يا مخبوطة يا جامدة خليتي الراجل يخرف

العريس شاف ضحكة مخبوطة على عبطه اتكسف ووشه بقى احمر .. اختشي يا مخبوطة عيب عليكي تحرجي الراجل !

العريس : آنسة مخبوطة .. عايزك تعرفي عني ..
( أيوة ؟ خير ؟ ... اتحفني ؟.. انا تعبت منكوا اوي ! )

- انا انسان بسيط جدا .. وطيب جدا .. انا وزوجتي ما كناش متفاهمين .. واستحملتها 17 سنة .. و

( انت هتعملي فيها امينة رزق !  .. والمطلوب مني اصدق دور الضحية ده ! ..هو في ضحية عضلاتها منفوخة كده ؟...)


واستمر الحوار بشكل طبيعي بين العريس وأبو مخبوطة ومخبوطة .. أبدى خلاله العريس احترامه الشديد لفكر مخبوطة ورغبتها في استكمال الدكتوراه ..
يا سلام .. عريس متحضر .. بس يارب يكون متحضر بجد
مش زي اغلب العرسان في اول لقاء
بيمثلي دور الشاب المتفتح العاقل الراسي
لحد ما اكدب نفسي واقول مش ممكن يكون ده عربي النشأة
تلاقيه فرنساوي ولا سويدي

وبعد كده
اكتشف انه اكبر شخصية رجعية في تاريخ البشرية
وانه لو كان جاي من قبائل اليويو كان احسن

ربنا يستر وما يطلعش عريسي يويو هو راخر



وبعد ما العريس مشي ..

بابا فرحان : ايه رأيك .. ربنا عوض صبرك خير .. الراجل من هيئته باين محترم وابن ناس
انا : صح يا بابا فعلا ..
ماما فرحانة اوي : الحمدلله الحمدلله


وهيييييييييييه هتجوز

سأل ابو مخبوطة على العريس سمع عنه كل خير .. ودقق في السؤال عن سبب تطليقه لمراته .. واتأكد انها كانت ست مفترية
وتعرفت مخبوطة اكتر على عريسها .. الله دمه خفيف اوي
وبيعاملني بذوق .. يا سلام
وكريم وبيبعتلي هدايا ...
مش زي البخيل اللي كان قبله







وقرينا الفاتحة ..
وكتب الكتاب اتحدد بعد اسبوع
والفرح بعد شهر
لولولولولولولولولولوي

ورجعت الحياة تدب في مخبوطة مرة أخرى .. والدنيا بقت حلوة من تاني .. واللي فات مات وأصبح ذكريات ..
ترررن ترررن

خطيبي : يا صباح الفل
انا : صباح النور  
- انا همر عليكي الساعة 1 عشان نروح نختار صالة الفرح
- اوكي ..

وصل خطيب مخبوطة .. وخدها وراحوا الصالة .. فندق فخم .. صالة تحفة .. الورد في كل مكان .. على السلم .. على الأرض .. الكوشة جنان .. ترتيبها يجنن ..

الراجل المسؤول عن الحجز : ايه رأيكوا ؟
خطيبي : ايه رأيك يا مخبوطة ؟
انا : حلوة اوي ...
خطيبي : على بركة الله
الراجل : اتفضلوا معايا نقوا شكل التورتة ..

فتح الراجل الكمبيوتر وقعد يفرج مخبوطة على نماذج لتورتات افراح تهبل ... كلهم احلى من بعض

انا : دي حلوة اوي .. بكام دي ؟
الراجل : دي 350 دولار يا افندم ..
مخبوطة اتكسفت وبصت على خطيبها تاخد رأيه لأن هو اللي هيدفع
انا : ايه رأيك ؟
خطيبي : اللي تحبيه ..
الراجل : في أسعار اقل لو تحبي ..
مخبوطة : اوكي وريني
- دي بـ 320 .. دي 290 .. دي 250 ..
مخبوطة بصت لخطيبها عايزاه يتكلم : .. ايه رأيك ؟
خطيبي : نقي اللي انتي عايزاها يا مخبوطة انا مش هتدخل في اي حاجة انتي بس تؤمري ..
( ده ايه الهنا اللي انا فيه ده .. مش قادرة اصدق !! )


الراجل : تحبي لون التورتة يكون ايه ؟
انا : بمبي ..
- كلها بمبي ؟
- ايوة كلها بمبي ..
( بمبي بمبي بمبي )

وحجزنا الصالة واخترنا تاريخ الفرح بعد شهر .. واخترت شكل الزفة ... والتصوير .. وشكل الخدمة .. ونوع الورد ...

الراجل لخطيبي : تحب تدفع دلوقتي كاش يافندم ولا على دفعات ؟
خطيبي : لا مش دلوقتي همر عليك بكرة ان شاء الله انا وواحد صاحبي وندفع المبلغ اللازم
( آآآآه انا الفار ابتدى يلعب في عبي )

وخرجت مخبوطة من الفندق هي وخطيبها .. وخدها على حتة هادية يعزمها على حاجة ساقعة .. وأثناء القعدة ...

- فاضل ايه يا مخبوطة كده ؟ شوية عفش جديد للبيت .. فستان الفرح .. وانتي بقى تجهزي نفسك لما نكتب الكتاب وتاخدي المهر ..
- ايوة ..
- مخبوطة .. مش عايزين كسل .. تنزلي تشوفي فستان وتجحزي عند الكوافير من دلوقتي لأن احنا في موسم صيف ومليان أفراح والحجز بقى صعب ..
- ان شاء الله .. بس مش لما نكتب الكتاب الأول بعدين ادور على الفستان ؟
- هنكتب الكتاب خلال الاسبوع ده المهم انتي تبقى نشيطة كده وتشدي حيلك عايزين نخلص من العك بتاع الفرح ... يلا قومي نمشي
- اوكي ..

( الحمدلله ربنا كريم مين كان يصدق انها هتفرج عليا من وسع كده ! )

راحت مخبوطة وقفت قدام باب المحل لحد ما خطيبها يدفع الحساب .. في الوقت ده مر شاب صغير وبص لمخبوطة وعاكسها .. دورت مخبوطة وشها وسمعت صوت من وراها
زي زئير الأسد ..
سلام قول من رب رحيم !!

خطيبي بينده على الشاب اللي عاكسني : انت يا ( ... ) .. تعالا هنا يا ابن الـ ( ... )
انا : ...
( ايه الألفاظ دي ؟! )

الشاب رد على خطيبي بنفس الألفاظ المهذبة..
وراح خطيبي ومسك فيه ونزل فيه بوكسات وشتايم والناس اتلموا علينا وانا بقيت واقفة مصدومة مش مصدقة ...
ايه الراجل المرعب ده !

جه خطيبي ووشه لونه بنفسجي من العصبية : يلا بينا نروح ... يلاااااااااا
انا : حاضر حاضر ..
راكبة جمبه في العربية منكمشة على نفسي وخايفة انطق بكلمة
هو بعصبية : بقولك ايه .. رقمك مش عاجبني .. صعب اوي .. لازم تغيريه ..
انا بدون نقاش : حاضر
- هجيبلك شريحة تانية .. ترمي اللي عندك دي وتحطيها .. فاهمة ولا اعيد الكلام تاني ؟؟؟؟؟؟؟؟؟؟
( لا تعيده ايه ! .. هبلة انا عشان اخليك تعيده ؟! .. منتا مش هتعيده بالكلام .. هتعيده بحركات رياضية تخليلي جفوني عبارة عن لوحة سيريالية متضاربة الألوان ! )
- اوكي ..


لما وصلت البيت :
ماما فرحانة : حجزتوا الصالة ؟ ... حددتوا موعد الفرح ؟؟؟؟
انا وما زال الذهول مسيطر على الوضع عندي : ... آه
- مالك في ايه ؟
انا وما زال الذهول مسيطر على الوضع عندي :
انا اتخطبت لراجل متوحش .....!


وطول اليوم مخبوطة بتفكر ..
ياترى ممكن اعيش مع الراجل ده ...
وانا اعضائي سليمة وكاملة العدد ؟
الظاهر يا بت يا مخبوطة .. انك هتزوري المستشفى اللي جمبكوا كتير
ابقى اعملي من دلوقتي علاقات طيبة مع الطاقم الطبي اللي هناك ... خصوصا سواقين الاسعاف
يعني مرة كوباية شاي .. مرة سندوتشات جبنة
يعني ... زبطي نفسك
الاحتياط واجب برضو




وترررررن ترررررن
- آلو ..
- آلو ازيك .. بتعملي ايه ؟
- الحمدلله .. قاعدة على النت ..
- النت ! .. وبتعملي ايه على النت ؟
- بلعب بلياردو ...
- بتلعبي بلياردو ولا بتكلمي حد ؟
- حد زي مين يعني ؟
- لا ما تاخديش في بالك ... مخبوطة نفسي اسألك ... ازاي وحدة زيك لحد النهاردة ما اتجوزتش ... ماكانش حد يتقدملك؟
- لا كان في ناس بيتقدمولي واتخطبت كزا مرة و ما بيحصلش نصيب ...
- اتخطبتي ! ... اتخطبتي ازاي يعني ؟؟
- يعني قراية فاتحة او كتب كتاب ... انت ما تعرفش ؟
- كتب كتاب ؟!!!! .... لا مش عارف هعرف منين ؟؟؟؟؟
- من الجماعة اللي سألتهم عني !!!
- لا محدش قالي حاجة !... يعني انتي دلوقتي مطلقة ؟!!!!!!!
- مالك في ايه ؟ انا كان مكتوب كتابي بس , مش متجوزة .. وبعدين انت زعلان ليه ؟ ما انت كمان مطلق
- ايوة بس انا كنت صريح , انما انتوا خبيتوا عليا !!!!
- انا ما خبيتش عليك حاجة ! ... لو بخبي عليك ماكنتش قلتلك دلوقتي اني كنت مخطوبة ! ...
- انا اخطب واقرا الفاتحة وفي الآخر اكتشف اني خاطب مطلقة ؟؟؟؟؟؟؟؟؟
- تقصد ايه ؟؟
- اقصد ان محبش حد يضحك عليا
- ايه الكلام ده .. لو سمحت ما تكلمنيش بالطريقة دي
- لا انا اتكلم زي ما انا عايز ... واعتبري الموضوع منتهي ..
- براحتك .

وطراااااااخ قفلت مخبوطة السكة في وش خطيبها ..
وقفلت موبايلها وهي بتعيط
الظاهر كده ان النحس اشتغل ..
وما قالتش لمامتها عشان ما تتقهرش ..
وخافت تقول لباباها عشان ما يتنرفزش

وبعدين يا مخبوطة في الحالة دي ؟!!
ماهما العرسان بيكونوا كويسين في الأول ..
ليه عند نقطة معينة
بيتحولوا لغربان سوداء تنعق بكل ما هو مؤذي
ليه بيبقى قبل الفاتحة آلان ديلون
وبعد الفاتحة محمود المليجي
وبعد كتب الكتاب .... شعبان عبد الرحيم
ليه ليه ليه !!


تاني يوم :
بابا : مخبوطة .. مخبوطة اصحي .. خطيبك عايز يكلمك ..
انا : ايه ! ..
فضلت ساكتة وباصة للموبايل بتاع بابا وخايفة اخده منه ..
بابا لاحظ ان عنيه وارمة من العياط .. بس من غير ما يسألني ليه اداني الموبايل وقالي : خدي كلميه .. شوفي هو عايز ايه ..
وخرج من الأوضة
وخدت الموبايل وبصوت مخنوق : آلو
- آلو .. مخبوطة .. انا آسف جدا .. ارجوكي سامحيني ماكانش قصدي ..

قالتله مخبوطة انها سامحته .. يلا .. يمكن سحابة صيف وتعدي بلاش نكبرها ..


وفي يوم : ترررن ترررن ..
خطيبي بيزعق : آلو .. انتي فين كل ده .. ساعة وانا عمال ارن !
انا : كنت بصلي !
- آه .. انا بعتلك شوية اكل وحلويات مع البواب ..
- ليه تتعب نفسك كده ... ماكانش له لازمة ..
- انا عايزك تتخني ..
- اتخن ! لا انا كدة كويسة .. ده انا حتى عايزة اخس عشان الفرح ..
- لا تخسي ايه ! ... انتي لازم تبقي فيل .. عارفة يعني ايه فيل ؟؟
( هو أمر عسكري ولا ايه !! عشم ابليس في الجنة )
- طيب .. المهم .. دفعت حجز الصالة ؟
- هه .. آه .. دفعتها ..

رن الجرس ودخل البواب شايل اربع كياس كبار مليانين من كل ما لذ وطاب .. آه يا خبيث ... بتجيب الاكل قدامي عشان تكسرلي الريجيم وتحولني لفيل الاحلام اللي بتتمناه ! ..
عمال بتنفخ فيا زي العجلة !

ولكن .. وللأسف
ماقدرتش مخبوطة تقاوم .. الفجع اللي فيها تمكن منها
وكلت منهم ووزعت الباقي على اخواتها ...

واختي المفجوعة تقولي : والله خطيبك ده يا مخبوطة مية مية
انا : ايوة هو يحرق في اعصابي وانتوا تاكلوا


وفي يوم : تررررررررن ترررررررررن ......
انا : آلو
خطيبي : انتي فين ؟؟؟
- كنت نايمة ...
- انتي ماعندكيش قلب ؟ لو ما اتصلتش بيكي ما بتتصليش بيا .. اشمعنى انا بكلمك مرتين وتلاتة في اليوم !
- منا اتصلت بيك اول امبارح !
- اول امبارح !!! كتر خيرك اوي ... بكرة لما نتجوز هطلعه كله على جتتك
( بلعت مخبوطة ريقها )
- انت عصبي اوي على فكرة
- ايوة لما اتنرفز معرفش اللي قدامي ..
- طب بصراحة كدة ... كنت تضرب مراتك ؟
-هي اللي كانت تستفزني ...
( يا نهار زي بعضه !!! )
- ما تفهمينيش غلط ... انا كنت اضربها لأن هي كانت غبية ... بس انتي حاجة تانية ... معقولة يعني هضربها من غير سبب !!!
- عارف لو اتجوزنا ومديت ايدك عليا .. عمرك ما هتشوف وشي تاني ..
- يا بنتي بقولك انتي حاجة تانية ... ما تقارنيش نفسك بيها !

والله منا مستريحالك .. لكن هنعمل ايه .. هي دي الاصناف الموجودة ... مفيش حد عدل ...
وبما انك يا مخبوطة كده كده قرفانة عيشتك من العنوسة ... غيري نوعية القرف وخليها قرفانة عيشتك من الجواز ...
واهو كله قرف في الآخر ... وادينا بننوع



وفي يوم : ترررررررررررن ترررررررررررن
يوووووووه احنا مش هنخلص من الاتصالات دي بقى ...
خطيبي بيزعق : آلو .. كنتي فيييين ؟؟؟؟
انا : في الحمام !
- آه طيب ...
- عملت ايه في موضوع كتب الكتاب ؟
تغيرت نغمة صوت خطيبي خالص وبقت وديعة اوي :
- مخبوطة .. انا ظروفي عاكستني شوية .. وكل شوية تطلعلي مشكلة في موضوع الفلوس ..
- طب والفرح اللي بعد عشر ايام .. والصالة اللي حجزناها !
- هو انا ما قلتلكيش اني لغيت الحجز ؟
( ايه !! .. انا كان قلبي حاسس ان يوم حجز الصالة ده كان كله تمثيل في تمثيل ! ... مناخيري شمت ريحة الندالة اللي اقدر اميزها عن بعد 8 كيلو .. لكن شككت في قدراتي المخبوطية ... انا آسفة جدا لنفسي  )
- ... امتى ؟؟
- أأأ .. امبارح .. وان شاء الله لما يبقى معايا فلوس وربنا يفرجها نحجز وحدة احلى منها ...
انا بنبرة مخنوقة ودموعي هتنزل : والفستان اللي حجزته !
- هي جت على حتة فستان ابيض .. انتي مش صغيرة على الكلام ده .. والله انتوا الستات عقلكوا صغير خالص ...

اتصدمت مخبوطة في تصرفات خطيبها المريبة ...
ودخلت في صراع بينها وبين نفسها ....

مخبوطة التعبانة : اتجوزيه يا مخبوطة .. اي حاجة احسن من قعدتك دي .. انتي عندك 31 سنة .. هتتتجوزي امتى بس ! مشاكل الجواز ارحم من مشاكل العنوسة ...

مخبوطة المؤمنة : اللي له نصيب في حاجة هياخدها .. ومش هيحصل الا اللي ربنا كاتبه
مخبوطة الواعية : الراجل ده باين عليه بتاع نسوان .. وفوق ده كداب وعصبي ودراعه سابقة عقله .. .. ده بكرة هيهريكي ضرب .. انتي مش شايفة عضلاته وشكل دراعه عامل ازاي ؟؟ .. كف واحد منه يوقع صف سنانك الشمال اللي هو اساسا تركيب .. وكل شوية بقى ترجعي للدكتور تقوليله معلش يا دكتور ثبتهم تاني اصل جوزي اداني بالقلم امبارح ! ... برستيجك هيتبهدل يا مخبوطة !! .. لا خليكي كده احسن ... قاعدة في بيت اهلك محترمة وسنانك في بؤك .. اه

وفي يوم : تررررررررن ترررررررررن ..
هفففففففففففففففففففف وبعدين بقى سرعتوني وعقدتوني من جنس الموبايلات كله
انا : آلو
خطيبي : آلو .. مخبوطة عايزك في موضوع
- خير ؟
- اتصلي على الرقم ده وقولي انك خطيبتي ..
- رقم مين ده !
- طليقتي ..
- ايه !!!!! ...
- مالك بتزعقي ليه ؟ لازم اثبتلها اني هتجوز ست ستها .. الهانم بتقول للناس انها مش مصدقة اني خطبت وبكدب عليها .. شايفة القرشانة !
- عايز تثبتلها ليه انت مش طلقتها مالك بيها ! .. انا لا يمكن اكلمها انت عايز تغيظها بيا !
- عشان خاطري عشان خاطري
- لا مش عايزة ... انا ما بحبش كيد النسوان ده !
- هتنفذي اللي بقولك عليه ولا لا ؟؟؟؟؟
- لا
- انتي دماغك ناشفة زي دماغ الـ ( ...... ) انتي فاكرة نفسك مين يا بنت الـ ( ...... )
- كل اللي بينا انتهى !!!!








وانتهت آخر خطوبة ... في حياة البت مخبوطة
بعد الخناقة مع خطيبها والربكة ..
اللي خلتها قفلت في وشه السكة
حاول يتصل بيها بالحاح
طالب المغفرة والسماح
لكن مخبوطة .. ما بقتش بالخطوبة مبسوطة
لأنه راجل ما لوش أمان ... وفي عقله حبتين جنان
اخلف بوعده وخيب أملها
وكدب عليها وضيع احلامها
مابقاش في رجالة تحترم مشاعر الستات
بعد ما زمن الرجولة عدى وفات
عرفتوا ليه البنات من غير جواز بتكبر ؟
لأن أصناف العرسان .. بقت تشل وتقهر


وحطت مخبوطة ايدها على خدها ... بتفكر في الاشكال اللي بتتخطب لها
داعية ربها ساعة فجرية .. يخلصها من هذه النوعية
اللي كانت السبب
في الخيبة العربية القوية




ـــــــــــــــــــــ



انتزروني في خيبات متفرقة مع العرسان وامهاتهم

هناك 9 تعليقات:

  1. ايه يامخبوطة ده .... ايه الناس دى .. بجد .. مش عارفة اقولك ايه فيه ناس كدا ...بس هو كان عاوز يغيظ مراته بيكى ..... ليه ... كان لية بيحبها ولا ايه ؟؟؟

    عارفة يامخبوطة .. نفسى بجد هموت وعرف ... ايه راى الشباب اللى بيقرو معانا .... فى الرجالة من النوع دع ؟؟؟؟ تفتكرى هيبقو راضين عنهم .. او ليهم تفسير للاحداث دى

    اصل يامخبوطة .. الكلام اللى انتى بتكتبيه ده .. موجود كثير قوى قوى .ز فى كل حتة .. ويمكن السر فى نجاح المدونة انك بتلمسى مواقف كثيرة قوى حصلت لبنات كثير مش انتى بس .....

    يعنى لو تعملى لنا مساحة . لكل البنات .. تكتب مواقف حصلت لها ... هتلاقى ان كل البلاد العربية مش فلسطين بس .... كل البنات بتتعرض للمواقف دى .. ياترى ...ز ايه السبب ياشباب ؟

    ردحذف
  2. نعم والله يا بيرو عندك حق..يا ريت نعرف رأي الشباب في النوعية دي..
    مخبوطة..انا كأني بقرا الخيبات لاول مرة..برافو عليك وعلى اسلوبك الشيق..
    انتي بتشدينا للقراءة بشكل جميل..
    ربنا يفك كربك وكرب بنات المسلمين جميعا يااااااااارب

    ردحذف
  3. هههههههههههه

    قلبي عندك وعلى العاهات اللي بتجيلك

    ربنا يعوضك خير

    ردحذف
  4. والله يا مخبوطه معاكي حق دول غربان مش عرسان...
    ربنا يسعد قلبي وقلبك ويرزق كل بنات المسلمين بالازواج الصالحين اللي يقدروهم ويعرفوا قيمتهم امين...
    تحياتي

    ردحذف
  5. اخيراااااااااا عرفت ادخل واشارك

    دايما مبدعة يا بنتى والله
    جووووووووو اون

    ردحذف
  6. :))))

    والله عندك صبر جاااااااامد
    وطولة بال علشان تكملي معاه لحد كده
    بس اهو عزائك الوحيد ان ضميرك مرتاح

    :)))

    ردحذف
  7. د. بيري وهداية منورين المدونة ..انا اسفة على الرد متأخر لكن مش بقدر اكتب تعليقات من الجهاز بتاعي خاااالص .....
    ياريت يا عبير اقدر اعمل مساحة للنقاش ... بس ازاي ؟ بتهيألي اي شاب عنده ضمير مش هيعجبه النوع ده من الرجالة ... النوع اللي بيدمر بنات الناس بغباوته .. لكن انا مش بلومهم بلوم امهاتهم اللي ما عرفتش تربيهم ...

    هداااااية .. انا مبسوطة باحساسك انك بتقريها لاول مرة ... ويارب يعجبكم

    ردحذف
  8. د. ولاء , البنفسج الحزين , شمس النهار .. ربنا يكرمكم على الدعاء الجميل واهتمامكم بالمتابعة ... يارب تكون الخيبات عجبتكم ... وانتزروني دايما هناك المزيد .. نياههاهاهاها

    ردحذف
  9. صنست اهلااهلا في المدونة التاريخية هههههههه ... منورانا كمخبوطة متابعة

    ردحذف

back to top إخبط لفوق