إجمالي مرات مشاهدة الصفحة

السبت، 4 ديسمبر 2010

خطوبة 2





جائني يا قراء يا كرام .. انه وفي احدى الايام ..
البت مخبوطة ومن بختها المعجباني...
اتنيلت على عينها
واتخطبت تاني
لعريس طويل القامة ... مفلطح الهامة
شديد الشبه لباراك أوباما










- شوفي يا بنتي ..
- ايوة يا بابا
- الشاب كويس .. تاجر ناجح ومقتدر مادياً .. سألت صحابه عنه قالولي عنه كلام طيب وكويس ... وعنده 30 سنة يعني اكبر منك بخمس سنين .. سبحان الله اهه ربنا بعته بعد فسخ خطوبتك على طول شفتي ربنا كريم ازاي
- ودرس ايه ؟
- هو لسة مسجل في الجامعة انتساب وبيدرس لغة عربية ..
- ايه يا بابا يعني مفيش معاه شهادة جامعة على الأقل ... ده انا بحضر ماجستير وكنت مخطوبة لدكتور !
- بقولك ايه الراجل محترم وده اهم حاجة .. ومقتدر مادياً مش هيحوجك لحد .. وشهادة الجامعة اهو بيدرس يعني عنده طموح وهياخدها في الآخر .. سيبك من كلام الناس ......... هااااه قلتي ايه ؟؟؟
- .....
- اقوله ييجي بكرة ؟؟
- اللي تشوفه يا بابا



هييييييييه هتجوز



- انتي هتخرجي للعريس كده ؟
- ايوة يا ماما
- طيب براحتك .. يلا ادخلي ..
( دخلت الصالون بدون تردد .. منا على وشك الحصول على الزمالة العربية في عرسان الصالونات .. )



وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله



وعمالة اقرب .. هو ده ! ... يااااااااااه كل ده طول .. هيخبط في السقف ! .. ومال نص شعره ابيض كده ! ..
طب راعي شعوري واصبغ شعرك !!
مش كفاية مفيش شهادة



اعقلي يا بت يا مخبوطة .. الراجل مش بطوله ولا شعره .. الراجل بأخلاقه .. بلسانه .. بكرمه ..
هو صحيح ممكن يكون مقلب ومافيهوش ولا وحدة من الصفات الكريمة دي .. لكن برضو بلاش تظلميه
ويقعدوا يقولوا البنات هما اللي جابوا لنفسيهم الكافية
بيعنسواعشان بيدققوا في شهادات العريس ..
وايه يعني لو كان عصامي وبنى نفسه وبعد ما استقر ماديا اتعلم وخد شهادة ؟ ...



ويا ستي ما تزعليش ..
كل ما هنالك ان الحكاية اتعكست
بدل ما يتخرج من الجامعة ويسجل اسمه بعدها في احصائيات البطالة
ويبقى شبه مقيم في كل قهاوي البلد وحريف كوتشينة وطاولة ..




لا .. كده انتي قديمة يا مخبوطة
قصدك هيبقى مقيم في كل كافيهات النت اللي في البلد وحريف فيس بوك وهكر وقاعد طول النهار عمال يحضر ابحاث ودراسات عن كيفية سرقة ايميلات وصور البنات ..
وبعدين يلاقي وظيفة نص كم يحوش منها كل شهر نص جنيه
وبعد ربع قرن يروح متجوز ...
لا
العريس ده بقى ريحك ... اشتغل وكون نفسه الاول ...ولغى مرحلة التعارف على الفيس بوك وسرقة الايملات من حياته
لأنه هيدرس وهو مشغول في البزنس بتاعه
ومش هيلحق يتعلم الهكر
وجهة نظر برضو



وبعد ما بصيت على العريس بصعوبة بسبب النور الذي تعكسه الخصلات الشايبة في شعره ... اللي خلت عينيا تزغلل
حاولت اقنع نفسي باستماتة
ان سواد شعر العريس لا يعني بالضرورة اني هكون زوجة سعيدة
العريس حس ان عينيا بتغمض وبتفتح لوحدها
فالتفتلي وهو مبتسم ..



العريس : ازيك يا انسة مخبوطة ؟
انا بدون اي كسوف او احراج : الحمدلله
العريس : ايه مالك زعلانة ليه ؟
( وبعدين بقى ؟؟؟ )
بابا : اصلها كانت تعبانة النهاردة شوية ... ها ها ها
( ............ لا تعليق !!!! )
العريس : قوليلي يا آنسة مخبوطة .. انتي بتعملي ايه دلوقتي ؟
- في الدبلومة
- يعني خلصتي جامعة مش كده ؟
- .... هه .. ايوة خلصت .. ماهي الدبلومة للماجستير
- هاهاها .. اصلي بصراحة معرفش في الحاجات دي ماليش فيها
انا : .....
بابا : ... أأأأأ ... اخبار شغلك ايه كلمنا عنه شوية ؟
- والله يا عمي انا خلصت تشطيب في مكتب العربيات بتاعي .. وحالياً دخلت من الجمرك 10 عربيات .. كلفوني كتير ..
وابتسم وبصلي : وان شاء الله وحدة منهم هدية للآنسة مخبوطة



( متشكرين يا خويا )
بابا : يا ابني احنا يهمنا الراجل مش العربيات ..
العريس : ده أقل حاجة ممكن اقدمها للآنسة مخبوطة يا عمي .. صحيح يا آنسة مخبوطة نوع موبايلك ايه ؟
انا : نوكيا 7250
العريس : لا لا لا .. ان شاء الله هجيبلك واحد محدش مسكه قبلك .. جبت لأختي واحد بألف دولار ..
(قصدك ايه ياد ؟؟ مش عاجبك الموبايل بتاعي ؟؟؟! )
العريس : عارفة يا آنسة مخبوطة اختي دي فرحها كلفني 30 ألف دولار ... عقبالنا ان شاء الله
بابا : يا ابني مش مهم كل الكلام ده المهم الاحترام والمعاملة بما يرضي الله
العريس : طبعا طبعا يا عمي ربنا ما يجيب حاجة وحشة

بابا : قومي يا مخبوطة قولي لماما تعملنا قهوة ( وغمزلي )




وجريت على اوضتي .... وهاتك يا عياط



ماما : ايه مالك ؟
انا : يا ماما ده ما بيفهمش حاجة غير في الفلوس !!
- ..... وبعدين هنفضل كده ؟

- معرفش انا مش قابلاه وشكلنا كده مش نافعين لبعض


بعد شوية جه بابا : الراجل روح .. ايه رأيك فيه ؟
انا : يا بابا ده طول القعدة يتمنظر عليه بفلوسه ...
- انتي عايزة تعنسي ؟ لو عايزة تعنسي قولي ؟
- لا مش عايزة اعنس .. بس برضو مش عايزة اتجوز ده ..
- الراجل كويس وقلنالك هيكمل تعليمه .. هو صحيح طويل اوي .. بس الطول للراجل زينة !
( الطول زينة اه بس مش للدرجة دي 220 سم !! ... اكلمه ازاي ؟.. مفيش حل بقى الا اني كل ما هعوزه اتصل بيه .. ولا اديله رنة عشان ينخ على ركبه )



بابا : يا بنتي ... الراجل المقتدر هيريحك في حياتك .. والتعليم مسيره ياخده انتي زعلانة ليه ؟ ولو انتي شاطره شجعيه على المزاكرة
انا كان نفسي تتخطبي قوام بعد ما خطوبتك اتفسخت ... وربنا حققلنا امنيتنا
انا : ...... طيب زي ما انتوا عايزين



وقرينا الفاتحة ..
مش لولولولولولولولولولوي




وبعد قراية الفاتحة من غير نفس
مخبوطة بدأت تتعامل مع الموقف كأنه ما حصلش اصلا
اصل لو رفضت هيقعدوا يجروا ورايا من اوضة لاوضة
عشان يقنعوني اوافق عليه بكلام يفتح النفس
زي ...
لو رفضتيه هتعنسي .. والفرصة تأتي مرة واحدة
عمرك ما هيجيييييلك احسن منه ... ويفسروا في وشي
ومهما قلت انه مش مناسب ليا شخصيا
مفيش فايدة ...
اوافق عشان اثبتلهم بالتجربة العملية انه ما ينفعش ..
في ناس كده لازم يتلسعوا من النار عشان يقتنعوا انها بتحرق
فقررت مخبوطة تجاري الوضع ...
ومع الوقت
وشوية شوية ..
تحقق اللي هي عايزاه
بدون ما تتعرض للضر .. أأ .. قصدي يعني لخلافات اسرية



ماما : مخبوطة .. يا مخبوووطة ... خطيبك قاعد في الصالون البسي وروحي اقعدي معاه شوية
انا : ... طيب



لبست ورحتله في الصالون : السلام عليكم .. ازيك ؟
خطيبي : اهلا اهلا ... ازيك يا مخبوطة ايه بتعملي ايه ؟
- عندي بحث وكنت بزاكر .. منتا عارف الامتحانات قربت
كشر وقالي : آه .. يا ستي .. ربنا يوفقك ..
- وانت اخبار مزاكرتك ايه ؟
- مزاكرة ايه ؟ ... آه آه .. يا شيخة بلا مزاكرة بلا بتاع يعني هعمل بالشهادة ايه منا الحمدلله مش محتاجها
( انا كنت حاسة من الاول !! )



- هو يعني ما بيتعلمش الا الفقرا عشان يشتغلوا بشهاداتهم ؟!
- التعليم ده للناس الخايبة ... المتعلمين بيتمنوا اشغلهم عندي !
( دي عقد نفسية بقى !! )
- يا سلام ! .. انت مش ناوي تكمل ولا ايه ؟
- ومين قالك اني ابتديت اصلا .. انا سجلت كدة بس عايز الشهادة ديكور .. انا ما بحبش القراية بتخنق منها .. المهم .. شوفي جبتلك ايه .. ايه رأيك ؟
- حلوة تسلم ايديك
- عارفة قزازة الريحة دي تمنها 100 دولار ..
- ... ميرسي
- وشوية الماكياج دول كلفوني يجي 150 دولار .. طبعا الغالي للغالي
( انت كل حاجة تجيبها هتقولي تمنها ! .. بتعايرني ولا ايه )
- ... قلنا ميرسي



وفضلت مخبوطة بعد كده تحاول تطفش خطيبها ده ..
مرة بتكشيرة

مرة بتطنيش .. مراااات بردود باردة ..
او تبصله بقرف
لكن ....... مفيش فايدة
لاااااازق لااااااازق




انا : بقولك ايه انت لازم تخلصني من الراجل ده بأي شكل
اخويا : طب اعمل ايه ! ..
انا : مش عارفة انا نفسيتي تعبانة وامتحاناتي قربت ومش عارفة ازاكر ..
اخويا : بصي ما تفكريش في اي حاجة غير مزاكرتك .. واوعدك مش هتكملي مع الراجل ده .. بس لازم تعرفي يا مخبوطة ان مفيش حد كامل ...
- عارفة .. بس مش ده ... مش ده ... مش ده



وراح اخو مخبوطة لخطيبها



- شوف عايزك في كلام رجالة .. بصراحة البنت وافقت عشان ما تزعلش بابا .. وهي مش عايزة تتجوز ... هاه قلت ايه ؟
- لا مش ممكن
- معلش حاول تفركش انت من عندك عشان هي مش عارفة تفركش ..
- طب مش هفركش !!
- ذنبك على جمبك بقى ...



و فضل اخو مخبوطة وجوز اختها يقنعوا في ابوها ان الراجل ده مش هيكمل تعليمه وانه ما ينفعش
واستنتجوا ان مخبوطة لو اتجوزته هتعمله عاهة مستديمة باستخدام احد ادوات المطبخ
وتاخد فيه 6 شهور وتبقى سوابق ..
اوتقتله وتترحل على عشماوي وتكون هربت من لقب عانس لتفوز بلقب المرحومة
وفي احسن الظروف هتطلق وترجعلهم بعيل
ونقول يا ريت اللي جرا ما كان ... نفركش من دلوقتي احسن




بابا - شوفي يا مخبوطة ... الراجل ده شكله كده مش ناوي يكمل تعليمه .. وانتي شكلك كده مش هتعمري معاه ........
لو مش عايزاه قولي من دلوقتي نفركش .. بصراحة انا واخوكي وجوز اختك كمان بعد ما اتعاملنا معاه ما ارتحنالوش .. نفكرش ؟
- فركش يا بابا فركش .. هيييييييييييييييه
( مش قلتلكوا .. مفيش احسن من الحلول السلمية .. ونجاري الوضع مؤقتا منعا لاراقة الدماء ... وخطوبة تفوت ولا حد يموت ... نياهاهاها)





 
وتخلصت مخبوطة من خطيبها المعقد ..
اللي كان عامل فيها مهند


بعد ما رجعتله كل هداياه الثمينة .. ومش عايزة منه برفان ولا زينة ..
وزاكرت مخبوط وجابت تقدير .. وجهزت نفسها لبحث الماجستير


داعية ربها يريحها من هذه النوعية اللي كانت السبب ..
في بهدلة مخبوطة البهدلة القوية



ـــــــــــــــــــ



انتزروني

هناك 12 تعليقًا:

  1. صباحووو
    برجع بقرأ البوست وبعلق إزا الله راد
    مبدأين
    عليكي واجب هوناااااه


    http://umomar.blogspot.com/2010/12/blog-post.html


    سلامز ل هلأ

    ردحذف
  2. لووووووووووووووووووووووووووووووول

    حاسه حالي بحضر بفلم فكاهي,,والبطله ياسمين عبد العزيز اللي عم بتمثل دور مخبوطه

    وك,,, ليه رجعت الهدايا
    مني ومنها بعتبرها تعويض عن الوقت الثمين اللي ضيعته وهيه عم بتحاول تفهمه إنه غير ملائم إلها


    صباح الخير للمره التانيه

    ردحذف
  3. ازيك يا مخبوطه عامله ايه
    مبروك عليكي المدونه
    انا لسه مكتشفاها امبارح
    بس واضح كده
    اني هاكون متابعه مستديمه ليها
    عايزة اقولك دمك خفيف موت
    وطريقه سردك لقصص الغربان قصدي العرسان
    طريقه ظريفه قوي ودمها خفيف ...
    بالنسبه بقا للعريس بتاع المرة دي (خطوبه2)
    فهو كان واضح من الاول انه
    مش مناسب لواحده في تعليمك وشخصيتك
    وان ميزته الوحيده هي الفلوس ...
    بس احنا البنات ساعات كتير بنتنازل
    عن اللي احنا عايزينه اما علشان مانعنسش
    أو تحت ضغط من الأهل اللي برضه خايفين علي بنتهم من العنوسه ..وبصراحه في الحاله دي العنوسه احسن ميه مرة من انك تعيشي مع زكيبه فلوس
    تحياتي

    ردحذف
  4. ماله الطويل يا مخبوطه


    يا بنتي هينفعك صدقيني لما تكوني عايزه تجيبي حاجه من فوق الدواليب بدل السلم هههههههههه

    بس ده واضح فعلا ان عنده عقد نفسيه

    ناقص يقولك انا اشتريكي انتي وشهادتك بفلوسي


    يلا خيرها في غيرها يا مخبوطه

    ردحذف
  5. ام عمر اهلين حياتي يعني دبستيني بواجب و انا اصلا ماعندي مدونة متل الخلق و الناس

    كيف بدي جاب يللا امري اله راح زبط المدونةمخصوص لحتى جاوب على الواجب هههههه

    سلاموووز

    ردحذف
  6. ام عمر اهلا بيكي ان شاء الله نعمل الواجب وزيادة هـهـهـه .. عجبتني حكاية انك متخيلة ياسمين عبد العزيز هي البطلة هـهـهـهـهـهـه ... خيالك جميل .... يارب يديم عليكي الضحكة شرفتينا فيري متش يو ار ويلكم

    ردحذف
  7. البنفسج الحزين .. منورة المدونة قهلا قهلا ... كلك ذوق يا بنفسج انا مبسوطة ان الحكايات عجبتك ميرسي لانضمامك ليها

    ردحذف
  8. ربنا يجيب اللي فيه الخير يا د. ولاء شفتي الاشكال اللي بقابلهم ..اهئ اهئ اهئ

    ردحذف
  9. اااااااااااااااااااااه,, هيه هاي مش مدونه صبح

    طب عسوله, بس تزبطي مدونتك, انا بإنتظار اللنك عندي

    ومخبوطه,, حبيت كلماتك,,
    تقبلي مروري لكان

    مسائكن ئشطه وعسل يارب..

    ردحذف
  10. السلام عليكم يا مخبوطات، أخيرا وصلت،
    مخبوطة ربنا يعينك يا رب،
    نسر جزاك الله خيرا، لولاك ما كتبت التعليق.

    ردحذف
  11. برافو يا بنات المدونة بقت كلاس خالص

    ردحذف
  12. انا بقى شايفة مى عز الدين ....اللى بتمثل دور مخبوطة .... علشان هى قمر زيها .. ماشاء الله الله اكبر عليكم انتم الاتنين

    ردحذف

back to top إخبط لفوق