إجمالي مرات مشاهدة الصفحة

الأربعاء، 1 ديسمبر، 2010

خطوبة 1





جائني يا قراء يا كرام ... أنه وفي احدى الأيام ..
البت مخبوطة اتخطبت .. واتقرت فاتحها
وبكلمة آآآمين اتختمت







- شوفي يا بنتي ..
- ايوة يا بابا
- الشاب ممتاز جدا انا سألت عليه وكل الناس شكرت فيه .. دكتور اسنان بيحضر ماجستير في امراض اللثة .. وحالته المادية ماشاء الله ... بيشتغل في مؤسسة للأسنان ده غير العيادة بتاعته .. وعنده 30 سنة يعني اكبر منك بـ 5 سنين ... ايه رأيك ؟
- ....
- اقوله ييجي بكرة ؟
- اللي تشوفه يا بابا






هييييييييييييييه هتجوز



- انتي هتخرجي للعريس كده ؟ وبعدين معاكي ؟
- ماله كده يا ماما ...
- حطي حاجة على وشك ... مش كل يوم هيجي عريس كويس كده !
- حطيت يا ماما .. عايزاني ابقى اراجوز عشان اعجبه !
- طب يلا ادخلي ..
مش قادرة .. وقفت على باب الصالون .. يارب المرة دي تكون اخر مرة اشوف فيها الموقف المقندل ده



اخويا : ادخلي يا بنتي يلا ..
- انت شفته ؟
- ايوة .. راجل ماشاء الله مالي مركزه
- بجد ؟
- لا مش بجد هو شبه الزبالين .. يابت بطلي عبط وادخلي ده لو عجبتيه احمدي ربنا



وانا داخلة : أأ .. السلام عليكم ...
العريس وقف : وعليكم السلام ورحمة الله ... بسم الله ماشاء الله



هو ده ! .. هو مش حلو اوي ..
بس شكله احسن من الدكتور العبيط اللي كان قبله بكتير ... ولابس كويس .. فاضل ايه ؟
فاضل التأكد من سلامة قواه العقلية



العريس : ايه يا آنسة مخبوطة مين مزعلك ؟
( انتوا كلكوا كده ولا ايه ! )



بابا : اصلها كانت تعبانة النهاردة شوية ... ها ها ها
( ايه يا بابا ده ! مش كل مرة ! )  
العريس : لا سلامتك ألف سلامة
انا بصوت مبحوح من الكسوف : .. الله يسلمك
العريس : باباكي قالي انك ناوية تكملي ماجستير صحيح ؟
انا : ان شاء الله ربنا يسهل
بابا : مخبوطة بنت طموحة ...
العريس : ماشاء الله والله يا آنسة مخبوطة انا اعجبت بحضرتك من قبل ما اشوفك .. انا احترم الفتاة اللي بتهتم انها تكمل تعليمها وانا هشجعك ان شاء الله للنهاية



انا : ... ربنا يخليك



( الحمدلله .. لحد دلوقتي مفيش اعراض شيزوفيرنيا )
العريس : آنسة مخبوطة ... ممكن اسأل سؤال ؟
( ربنا يستر )
انا : ايوة اتفضل
العريس : انتي ليه درستي اقتصاد وعلوم سياسية مش شايفة انه مجال ينفع للرجالة اكتر ؟
انا : لا شايفة انه ينفع للكل ...
العريس : طب اخترتيها ليه طموحك تبقي وزيرة مثلا ؟
( ااااااه ابتدينا في العبط  ! )



انا : لا طبعا مش شرط بس ... يعني ... اصل ...
بابا : .. أأأأ .... هي درستها لأنها كلية مهمة وبتدي الطالب ثقافة عالية وبعدين يا سيدي انت بعد كده حر عايزها تبقى وزيرة عايزها تقعد في البيت ده شيئ يخصك .. ها ها ها
العريس : هاهاها ياعمي مش قصدي والله بس انا يعني حبيت اعرف طبيعتها لتكون بتحب السياسة والمشاكل وكده يعني ...
بابا : لا يا ابني .. بنتي ما بتمارسش اي نشاط هي بتدرس بس
العريس : ماشاء الله يا عمي ربنا يبارك فيكو ... آنسة مخبوطة ممكن سؤال ؟
( هااه ... اتحفني ... )
انا : ايوة اتفضل
العريس : انتي موافقة ؟
انا : على ايه ؟
العريس : عليه !
( من اولها كده ... ! )
بابا : ان شاء الله خير يا ابني انت قلقان ولا ايه ؟ ها ها ها
العريس : والله يا عمي ما هيجيلي نوم الا لما اعرف رأيها ... اذا سمحتلي يعني ...
بابا : مبدئيا يا مخبوطة ايه رأيك في الموضوع ؟


( هو انا اعرفك يا راجل انت عشان اقول رأيي من دلوقتي ! )
انا : ... مبدئيا ... يعني ... ان شاء الله خير
العريس : يعني موافقة ؟
بابا : ......... قولي ما تتكسفيش ... اتكلمي عادي ..
( ايه يا بابا خايف على العريس اللقطة ليطير اوي كده )
انا : ان شاء الله ..
العريس : الحمدلله ...
بابا : اخيرا وافقتي ! ... اخيرا !! .. ده انتي طلعتي عيني
( يادي الفضايح .. يا بابا مش قدام الراجل .. )
بابا : مخبوطة روحي قولي لماما تعملنا قهوة ...






جريت على اوضتي ..
اختي : هاه ايه الأخبار ؟
انا : والله مش عارفة ... محتارة شوية
- يا ستي وافقي وخلاص ...
- مش عارفة هو اهبل شوية ولا انا بتهيألي ؟
- بصي العريس في اول قعدة بيكون مرتبك ويعك في الكلام انتي لازم تعذريه ... وصدقيني الرجالة دول مش هتلاقي فيهم الكامل اوي يعني ... الا ما يطلع فيه علة ... بس عموما لازم الحياة تمشي ... كلنا بنشتكي من جوازنا اهه مين مرتاح !


- على رأيك



بعد شوية جه بابا : الراجل روح .. ايه رأيك فيه ؟ بقولك ايه ... ما تطلعليش القطط الفطسانة فيه.. الراجل كويس واحسن من كل اللي قبله ... احمدي ربنا بقى ومش عايز كلام كتير ... قلتي ايه ؟
انا : اللي تشوفه يا بابا ...






وقرينا الفاتحة ..
لولولولولولولولولولوي





صاحبتي : ايوة يا عم مين قدك .. هتعملي ايه يا مخبوطة في كل المهر ده ! ...
( بتقروا علينا ولا ايه )


انا : مش لما نكتب الكتاب واخد المهر الأول
- يا ستي ادينا بندردش ...
- مش عارفة بفكر اشتري عربية .. ايه رأيك ؟
- فكرة هايلة ... والدهب جيبيه كله من داماس .. اعرف وحدة خياطة يا مخبوطة تهبل ... وكوافير شاطرة اوي .. لما يرجع خطيبك من السفر انا هعملك كل حاجة ... نفسي اشوف شكله اوي .. على فكرة انا شفت امبارح دكتور سألني عنك
- مين ده معرفوش
- انما ايه زي القمر .. قلت يا خسارة لو كنا عرفناك قبل ما مخبوطة تتخطب ... يمكن كنت انت من نصيبها .. انا متأكدة انه احلى من خطيبك ... خسارة اصله امور اوي
- ...... انا عارفة بقى كل شيئ قسمة ونصيب



ومرت الايام ....



خطيبي : آلو .. ايوة يا مخبوطة ازيك ..
انا : هترجع امتى كل مرة تقولي بعد اسبوع وبعدين تأجل ..
- معلش بقى ظروف .. عايزة حاجة اجيبهالك معايا ؟
- لا سلامتك .. المهم ترجع بالسلامة



( انا قلبي مش متطمن وحاسة كده ان الخطوبة دي مش هتتم )



بابا : خطيبك ماقالش راجع امتى ؟
انا : لا يا بابا ..



ترررررررررن تررررررررررن



خطيبي : ايوة يا مخبوطة ... انا عندي مشكلة
انا : مشكلة ايه ؟
- ماما ...
- مالها ؟
- عايزاني اخطب بنت خالتي .. وبصراحة مش مخلياني اسافر عشان اتمم الموضوع ..
- يا سلام ! .. تخطبها وانت خاطبني ازاي يعني ؟؟
- مخبوطة هي مش عايزة تجوزني من غير ما تشوف العروسة ..
- طب اعمل ايه اسافر لها ؟ !!
- انتي عارفة مخ الستات الكبار ... عايزة تشوفك كويس لأنها شايفة ان الصور مش كفاية .. مستعد ادفعلك تمن التذكرة بس تعالي ..
- لا طبعا مش جاية .. هو انا فرجة !!
- انا مش عارف اعمل ايه
- براحتك ... عايز تخطب بنت خالتك انت حر
- لا مش عايز والا كنت خطبتها من الأول .. بس ماما ..
- لو مش قادر تقرر سيب ماما هي اللي تقرر ..















وطرااااااااااخ قفلت مخبوطة السماعة في وش خطيبها اللي ماعندوش شخصية



اتصل خطيبها في أبوها وحاول يقنعه يخلي مخبوطة تسافر عشان مامته تتفرج عليها وتقرر اذا يتجوزها ولا لا ...
ابوها مارضيش






وقال






فرررررررركشششششش






صاحبتي : بجد !... فسختوا الخطوبة ؟!



( هي مالها فرحانة كده ليه ! )
انا : ايوة فسختها ..
- انتي زعلانة ليه مش انتي ماكنتيش بتحبيه ؟
- ايوة بس يعني الموقف مش حلو ..
- انتي لسة صغيرة وبكرة ييجي اللي احسن منه .. فاكرة الدكتور الامور اللي قلتلك عليه ؟
- ماله ؟
- مش طلع خاطب !!!!
انا : هاه ...





















وبعد ما جت الطوبة في المعطوبة ... وانتهت لمخبوطة اول خطوبة ..
بسبب ان العريس دلوع امه
اللي كانت مسيطرة على دماغه وفهمه
وقالتله لازم اشوفها واتفحصها ... واقطعها وادوقها وابلعها
وكأن البت مخبوطة بطيخة
ولا يمكن حتة فسيخة

 عايزة تقرب عليها وتشمها .. وتشد شعرها وتلمها
عشان مش واثقة
في ذوق المحروس ابنها
والخايب بدل ما يقولها عيب ... قعد يعيط لمخبوطة بنحيب
شباب الزمان ده

بجد شباب عجيب
وحطت مخبوطة ايدها على خدها .. بتفكر في الاشكال اللي بتتقدملها
داعية ربها يريحها من هذه النوعية
اللي كانت السبب .. في خيبتنا القوية



ــــــــــــــــــــ






انتزروني

هناك 7 تعليقات:

  1. والله دمك زي العسل

    سيبك من دلوعة ماما ده اللي عايزه تتفرج على البضاعه قصدي العروسه

    متابعه باقي الحكايات يا قمر

    ردحذف
  2. اهلا دكتورة ولاء و شكرا على تلبية الدعوة خليكي معانا انت حتستمتعي جدا
    خليكي مع قبيلة الخبط
    هههههه

    ردحذف
  3. انا جايه عن طريق الدكتورة ولاء

    وانا بشكرها انها عرفتني على المدونة الجميلة دي

    دمك شربات يا بت يا مخبوطة

    كويس انه العريس ظهر على حقيقته من اولها

    بدل ما كنتي اتدبستي فيه واكتشفتي امره

    اسمحي لي بمتابعتك

    ردحذف
  4. ربنا يكون في عونك يا مخبوطه على الاشكال دي ده داخل يشتري مش يخطب انا بكره الصنف ده من الناس اللي يفتكر انه بفلوسه ممكن يشتري بنات الناس وناسين انه البنت بتبحث عن شريك حياه يصونها ويحسسها بالامان مش شريك في البورصه او سفقه ده انسان فارغ فاكر انه فلوسه حتخليه يتجوز اي بنت ويتنمنظر فيها .....ربنا حيعوضك اكيد كل الخير وفي انتزارك....
    وطبعا برحب في الدكتوره ووداد وكل الناس اللي اشتركت او حتشترك اوتتابع المدونه ....

    ردحذف
  5. د. ولاء : اهلا بيكي شرفتينا في المدونة انا مبسوطة انك هتابعينا وان الموضوع عجبك ... يو ار ويلكم والله

    ردحذف
  6. وداد : منورة المدونة يا وداد وسعيدة بمتابعتك اهلا بيكي جدا جدا

    ردحذف
  7. مسرورة معاكي حق .. كل اللي البنات عايزينه الامان والاحتواء ... مش مجرد حمــ ... احم احم ... معاه فلوس يعني

    ردحذف

back to top إخبط لفوق