إجمالي مرات مشاهدة الصفحة

الاثنين، 6 ديسمبر، 2010

خطوبة 3 : قبل كتب الكتاب



جائني يا قراء يا كرام .. أنه .. وفي احدى الأيام
البت مخبوطة .....



اتخطبت تالت ... و ..



اصل ... اصل ... خطيبها ..
المرة دي ....



أأأ ... أأأ ...



أأأأأأأأأأأأأأأأأأأأع






- شوفي يا بنتي ..
- ايوة يا بابا
- المرة دي دكتور وبيحضر ماجستير في الجراحة , هو صحيح لسة طالب وما بيشتغلش وظروفه مش مساعداه اوي , انما جاد في طلبه واحنا اللي يهمنا يا بنتي الأخلاق واهو مستواه التعليمي ممتاز مش ده اللي انتي عايزاه ؟
وسنه من سنك بالزبط 27 سنة , انا سألت عنه وكل الناس شكرت فيه وقالولي جوزه بنتك وانت مغمض .. ها قلتي ايه ؟
- .....
- اقوله ييجي بكرة ؟؟
- اللي تشوفه يا بابا



هييييييييه هتجوز



ماما : بقولك ايه المرة دي هتلبسي بنطلون قدام العريس فاهمة , وتحطي مكياج كويس على وشك
انا : اشمعنى يعني ...
- عشان تباني اصغر منه
( آااااه دخلنا في المرحلة الذهبية من حياة كل بنت .. وهي التعقيد من السن ! ... لازم نعمل احتفال بالمناسبة دي !! )
- بنطلون اوكي انما مكياج كتير لا !



ودخلت الصالون ... بخطى الخبير الواثق في مجال الخطوبات الصالونية



وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله



وعمالة اقرب .. هو ده ! ..
معصعص ! .. وايه المساحات الصحراوية دي !!
ده اقرع يا بت !!
بس للأمانة يعني .. هي المساحات الصحراوية دي مش شاملة كافة مناطق الرأس .. يوجد بعض اعشاب السافانا على الأطراف
عشان ما نظلمش الجدع

يلا المهم يكون تحت القرعة دي مخ بيفهم ..
يارب يكون بيفهم
يارب يكون بيفهم

العريس : ازيك يا انسة مخبوطة ؟
انا بصوت زهقااااان : الحمدلله
العريس : ايه مالك زعلانة ليه ؟
( لا تعليق )
بابا : اصلها كانت تعبانة النهاردة شوية ... ها ها ها
( وبعدين بقى ؟! )



بعد شوية العريس حط ايده على خده وبصلي وسرح .. وفضل سرحان .. سرحان .. سرحان .. هو عايز يرسمني ولا ايه ؟
بابا للعريس : اخبار مزاكرتك ايه ؟
فاق العريس من سرحانه العميق : آه .. الحمدلله ياعمي كله تمام .. ازيك يا آنسة مخبوطة ؟
انا : الحمدلله
- كويسة ؟
( ما قلنا الحمدلله )
- اه الحمدلله ... انت كنت عايش في السعودية من زمان ؟
- ايوة طول عمري هناك ... رحتيها قبل كده ؟
- زمان وانا صغيرة
- وان شاء الله هتروحيها معايا كتير
( طيب يا خويا اما نشوف ! )
بابا للعريس : وناوي تسكن فين ان شاء الله بعد ما تسيب سكن الطلاب ؟
العريس : مش لما نعرف رأي الآنسة مخبوطة في الموضوع الأول يا عمي ؟
بابا : مخبوطة بنت عاقلة ورأيها من رأي ابوها

( التفتلي بابا وبصلي بصة تهديد معناها اياكي تعترضي .. اعترض على ايه هو انا فضل فيا حيل اعترض
المجتمع هد قوايا الاعتراضية .. احم احم .. مؤقتا يعني)



بابا : ولا ايه يا مخبوطة ؟
انا بصوت لا يكاد يسمع وعنيا في الأرض : .. إممم
( العريس رجع للسرحان تاني .. وعمال يتأمل كأني مخلوق فضائي عجيب اول مرة يشوفه .. انت عبيط ياد ؟! )
العريس بعد ما فاق من سرحانه : بصراحة يا آنسة مخبوطة اعتقد السيد الوالد قالك عن ظروفي ..
انا : .. إممم
العريس : الحقيقة في البداية مش هقدر اجيب شقة في المنطقة اللي انتوا عايشين فيها دي .. في عندك مشكلة في الموضوع ده ؟
بابا : لا ماعندهاش مانع طبعا .. احنا يهمنا الأخلاق والمعاملة الحسنة .. ولا ايه يا مخبوطة ؟
انا بصوت انهكه الزهق : إممم .. طبعا
العريس : طب الحمدلله رب العالمين ..
بابا : قومي يا مخبوطة قولي لماما تعملنا قهوة .. ( وغمزلي )

قمت ومشيت على اوضتي بجرجر نفسي زي السلحفاة المعمرة ...
ماما واختي : هاه ايه الأخبار ؟
انا : إممم .. كويس
اختي : عجبك ؟
انا : عادي .. مش مهم .. اي حاجة
- لو كان راجل كويس يا مخبوطة صدقيني
هتفرحي فرحة كبيرة ..
- إممم .. ان شاء الله

بعد شوية جه بابا : الراجل روح .. ايه رأيك فيه ؟ أظن كويس مفيش عليه اعتراض ...

انا باستسلام : لا يا بابا مفيش اعتراض ..

وقرينا الفاتحة ..
وكتب الكتاب بعد عشر ايام
لولولولولولولولولولوي



ماما : مخبووووطة ..
انا : ايوة يا ماما
- كلمي باباكي على التليفون ...
- آلو .. ايوة يا بابا
- هو فستان الخطوبة يتكلف أد ايه ؟
- مش عارفة الأسعار متفاوتة حسب الفستان .. ليه ؟
- عشان ابعتلك الفلوس مع السواق تنزلي انتي واختك تنقوا واحد خلاص الحفلة قربت مفيش وقت ..
- طيب يا بابا مش المفروض هو اللي يجيبلي الفستان !
- ظروفه ما تسمحش دلوقتي .. مش عايزين نتقل عليه
( نتقل عليه ؟! .. بابا ده مسكين .. فاكر ان عرسان الايام دي بيطمر فيهم !! مش عارف ان الدراسات اثبتت ان عرسان ما بعد سنة 2000 سجلوا أعلى مستوى ندالة عرسانية على مر التاريخ )
- حاضر يا بابا




اتخنقت مخبوطة وراحت اوضتها تعيط
ماما : مالك ؟
- باين عليه من اولها بخيل
- ليه ؟
- قال مش قادر يجيبلي فستان ! .. مش عيب عليه يخلي بابا يجيبهولي ... مش قادر يستلف تمنه يعني ! ... انا مش مرتحاله 
- وبعدين في حظنا ده .. ربنا يفرجها .. معلش استحملي اللي عايزة تتجوز لازم تتنازل شوية وتعديها !!



وبعد ايام خرجت مخبوطة مع عريسها ووالدتها واخوها عشان ينقوا الشبكة ..
خطيبي : تحبي نروح محل معين نجيب منه الدبل يا مخبوطة
- لا .. انت تعرف محل ؟
- انا بسألك انتي .. عايزة مكان معين نروحه ؟
- في المول في محل دهب حلو .. ممكن نروح عليه
- لا انا اعرف محل واحد صاحبي وهيراعينا في الأسعار
( اومال بتسألني من الأول ليه ؟ .. هو ايه يختي ده ؟! )



نقت مخبوطة الدبلة .. العريس اتدايق قال غالية اوي .. وفضل ساعة واقف يفاصل في صاحب المحل على سعرها .. بعد شوية طلع رزمة فلوس من جيبه آااد كده ودفع تمن الدبلة ورجع الباقي في جيبه.. ويلا نروح ...



ايه خلاص كده ! ... مفيش خاتم ولا حاجة !
بصت مخبوطة لمامتها وهي مكسوفة مش قادرة تتكلم ...
ماما شاورتلي براسها ان معلش عديها ...



ايوة يا مخبوطة عديها .. ما انتي عارفة انه مخنوق وظروفه صعبة ..
مش يمكن الرزمة الكبيرة اللي معاه دي شايلها لتكاليف تانية !
ما تبوظيش الدنيا عشان شوية شبكة
ويقعدوا يقولوا ان كل البنات بتعنس عشان بيدققوا في الشبكة



ويرسلولنا نداءات استغاثة ..
يا بنات ..

خففوا الطلبات عن العريس

وخذوهم فقراء .. هو انتوا بتعنسوا من شوية ! ..
ده انتقام ربنا منكوا ... من اللي بتعملوه في الشباب المسكين


مااااشي ...
ادينا ساعدنا العريس .. الشبكة اتأجلت لحين ميسرة
والفستان والكوافير والحفلة
بقم على شكل ديون .. وبالتقسيط المريح
عشان نقف جمب الشباب الغلبان ..
اللي كل مشكلته .. انه فقير ومش لاقي يتجوز
ولا يعاني من اي مشاكل اخرى كنقصان الاهلية واهتزاز النفسية وشلل رباعي في قواه العقلية

طيب يا مجتمع يا ندل
ادينا بناخد بالاسباب .. عشان محدش يقول انتوا عايزين عريس كامل الدسم
اهو عريس منزوع الدسم .. ومنزوع شعر الرأس كمان





يوم الحفلة .. لولولولولولولولولي



دخلت مخبوطة المطبخ ,, وتفاجئت من هول ما رأت ..



- ايه كل الحلويات دي ؟ خطيبي جاب كل ده ؟
اخويا : لا ده بابا اللي جابها
- كمان ! .. هو عريسي ده مش هيتكسف على دمه ويجيب حاجة !
- ماهو هيرجع كل حاجة بعدين لما اهله يبعتوله الفلوس
( طيب ... ماشي ... اما نشوف)





جهزت البت مخبوطة ووصل العريس وسط الزغاريت .. لولولولولولي
انما ايه الشياكة دي يا واد..!



انا للعريس : منين البدلة دي ؟
- من المول .. ايه رأيك ؟
يا نهار اسووود !! ...جايب لنفسك بدلة واستخسرت تجيبلي فستان !!!!!
 يووووه وبعدين معاكي يا مخبوطة !!! ما تظلميهوش مش يمكن فهمتيه غلط ... كل الناس قالوا انه واد محترم جدا اتجوزيه وانتي مغمضة .. هيكونوا كووووول الناس غلط وانتي اللي صح يعني !!
مش يمكن البدلة الانيقة دي استلفها من المكوجي ومكسوف يقول !!











وقعدت مخبوطة العروسة .. جمب عريسها وهي مفروسة
بتبص للمعازيم بعنيها .. اللي لاحظت انهم حاقدين عليها
وان كل واحدة فيهم بتتمنى ..
تخطف عريس مخبوطة ... من بين ايديها




مش عارفين ان مش كل عريس بيبقى راجل ..
ولا كل مخطوبة
من السعادة بتتمايل






ــــــــــــــ
انتزروني
 







هناك 11 تعليقًا:

  1. اتنازلتي خلاص يا مخبوطه


    بالهنا والشفا مقدماً

    هههههههههههههههههه


    متتأخريش عليا في الحلقه اللي جايه

    عايزه اعرف ايه اخرتها مع الامور اللي ممعهوش فلوس وجاي يتجوز على حساب باباكي

    ردحذف
  2. لوووووووووول

    شوقتينا نعرف مين رح يدفع إجره المأذون

    يما شو بكره الناس البخيله,,,
    بموووووت منهم
    بحس حالي بدي أضربهم ضرب


    مساء الفل..

    ردحذف
  3. يا سلام على الرجولة ..دا انسان اتكالي من اولها..
    يعني لما يوقف على رجليه مش حيعبركو..يا لطيف

    ردحذف
  4. بس أعتقد ان فستان الخطوبه و الكوافير و غيره من مستلزمات الخطوبه على العروسه مش العريس لكن الخاتم بقى مُهم
    عموماً في الانتظار تحياتي لكم

    ردحذف
  5. جميلة حلقات جميلة وشيقة لها طعم خاص ومميز
    متابع بشدة

    ردحذف
  6. في الانتزار يا مخبوطه ....عارفه المشكله في الماديات لانها امور شكليه المشكله في الشخص نفسه لو بيعتبر انه التنازل حق من حقوقه وانك فرض لازم عليكي تعملي كده هنا بتكون المصيبه وبعد كل ده ممكن يطلع مستغل وميستحقش اي تنازل ....والظاهر انه هو مصدق لقى ناس تساعده اتبسط وتشيك هاهاهاها ....في انتظار باقي القصه ....

    ردحذف
  7. يا رب ارحمنا من الأشكال ذي يا رب،
    مخبوطة ربنا يعوض عليك بالزوج الصالح إلي بيخاف ربنا و الي بيراعيه في كل تصرفاته من الصغيرة للكبيرة يا رب.

    ردحذف
  8. ايه العريس الشلل ده ... هههههههههه مش عارفة اقولك ايه ؟؟؟ بس انا عاوزة اعرف حاجة .... ياترى ايه احساس الرجال عامة لما بيقرو ان فيه ناش بالشكل ده ...؟ نفسى اسأل حد متابع ... ياترى ده شىء طبيعى .... ان يبقى فيه رجال بهذا الشكل ؟؟؟ مش عارفة ياريت حد يرد على ؟

    ردحذف
  9. - اهلا بيكم جميعا مسرورة وهداية وزوليخة وهنودة وفاطمة د. ولاء منورين جايز فيري متش

    ردحذف
  10. - اهلا يا استاذ مجدي شرفتنا

    ردحذف
  11. اهلا يا شيرين بيكي معانا في المدونة .. بخصوص الخطوبة يا شيرين عندنا في فلسطين ان كل حاجة على العريس .. ماعندناش تقسيمات اوي في الحاجات دي وبتختلف من منطقة للتانية .. اهلا بيكي شرفتينا

    ردحذف

back to top إخبط لفوق