إجمالي مرات مشاهدة الصفحة

السبت، 18 ديسمبر 2010

ام العريس .. سوسة !!


جائني يا قراء يا كرام .. انه وفي احدى الأيام
من أيام صاحبة البخت المايل
ميلان عظيم وهايل

البت مخبوطة ... اللي شافت الهوايل

جت قريبتها وفي ايدها ام العريس .. عشان تتفرج على صاحبة البخت التعيس
و تعمل لمخبوطة كشف هيئة ..
قبل ما ييجي الواد ابنها..  بطلته العايئة
بيقولوا انه طالب دكتوراه في مجال الاجهزة الطبية
يعني عريس لقطة ..  ومواصفاته مية مية


تررررن ترررررن ...


ماما : آلو ..
وحدة قريبتنا : آلو .. ازيك يا ام مخبوطة ..
- انا الحمدلله ازيك انتي ؟
- تمااام التمااام .. اخبار مخبوطة ايه ؟
- كويسة .. الحمدلله على كل حال ..
- بصي من الآخر كده .. عندي عريس لمخبوطة انما ايه .. ماجالهاش قبله ولا هيجيلها بعده ..
- ايه ! .. والله ؟ .. بتتكلمي جد !
- اومال بهزر !
- بيشتغل ايه ؟؟
- قال بيشتغل ايه قال .. ده يا ستي على وشك انه ياخد الدكتوراه في هندسة الأجهزة الطبية ..
- بجد !!
- وبيشتغل استاذ في كزا جامعة .. وكل شهر بيقبض الشيئ الفلاني .. شقته جاهزة وعفشه جاهز ومش ناقصها الا العروسة .. ولما امه سألتني ماتعرفيش بنت حلال نخطبها له قلتلها موجودة طبعا ... مخبوطة ومفيش احسن من مخبوطة ..


هي الست دي بتتكلم جد ! ولا بتهزر !
لا جد يا مخبوطة !
ده عريس ديجيتال يتمتع بتقنيات عالية !
مش ناقصه حاجة
غير انك تشوفيه !
واعتقد ان واحد زي ده مش هيكون له علاقة لا بالشامبانزي
ولا بأي شخصية محترمة من الشخصيات المقيمة في
جنينة الحيوانات العريقة اللي بيعملوا ليكي زيارات دورية في الصالون كل شوية
 


تررررن تررررن ...


قريبتي : آلو .. المعاد بكرة الساعة 6...


ياااه على طول كده !
احيي الناس النشيطة اللي شايفة شغلها كويس 

غالبا في الحالات دي الحركة التلقائية اللي بترافق سماعي لتحديد موعد اللقاء
ان ايدي بتطول لوحدها وبتروح على بيانات الدولاب ..
وبضغط على ايقونة اللبس المناسب حسب تاريخ الشراء الاحدث ..

  يا سلام ..
طول عمرك شاطرة ومنظمة ومبرمجة يا بت يا مخبوطة



وجاء اليوم المنتظر ..
رن جرس الباب .. ودخلت قريبتي ومعاها ام العريس .. اللي قعدت تقلب عينيها في الشقة شمال يمين ..
للأعلى وللأسفل .. شرق وغرب
ايه الحكاية ؟؟
هي جاية تخطبني انا ولا تخطب الشقة !


خرجت اسلم على ام العريس وقربت منها اقدملها العصير ملامحها لا تبشر بخير الحقيقة
لو ابنها شبهها تبقى مشكلة .. بجد مشكلة


ام العريس : ماشاء الله ... اللهم صلي على رسول الله .. ازيك يا ....
انا : مخبوطة
ام العريس : عاشت الاسامي .. بتشتغلي بقى يا مخبوطة ؟
انا : لا يا طنط
قريبتي : ان شاء الله لما تخلص الماجستير هتلاقي شغل محترم
(هـهـهـهـه ... متفائلة اوي قريبتي دي  )
ام العريس : طبعا هم يطولوا !
ماما : والدكتور ان شاء الله لو حصل نصيب هيسكن معاكوا في نفس البيت ؟
ام العريس : آاااااه اومال ايه ... ابني عنده شقة جاهزة في الدور التاني ديكور ايه وعفش ايه دفع فيها الشيئ الفلاني .... وان شاء الله بنتك هتنورها ..
ماما : ربنا يجيب اللي فيه الخير ...



افهم من كده ان كل حاجة ماشية تمام ؟
ما دام ام العريس ختمت عليا الاوكي ..
يبقى احط في بطني بطيخة صيفي واعتبر ان الجوازة تمت خلاص ...
اومال ايه !
ام العريس هي الورقة الرابحة


وبمجرد ما مشيت ام العريس ...
دخلت مخبوطة اوضتها .. و ما لبثت ان غرقت في بحر
الأحلام والتخيلات ..
خصوصا الأحلام بتاعت انتشار خبر الخطوبة
وااااااااو

ويحتل الخبر العناوين الرئيسية في اخبار الجزيرة ..
والمذيعين النضاف ولاد الناس دول
بيذيعوا الخبر ..


احم احم  
سيداتي سادتي أسعد الله مسائكم بكل خير ..
نقدم لكم حصاد اليوم من قناة الجزيرة نستهلها بالعناوين الرئيسية ..


وتطلع صورتي على الشاشة بقى وهما واخدينلي لقطة قريبة من الجمب كده وحواجبي معقودة زي كبار الشخصيات
ويرافق عرض الصورة صوت المذيع

تمت اليوم اولى المقابلات الخاصة لمشروع خطوبة الفتاة مخبوطة .. من عريس بيحضر الدكتوراه
التفاصيل مع مراسلنا من بيت مخبوطة

المراسل
بيتنحنح ... وبيقول الخبر بطريقة الالقاء الفنية اياها :


ليس العجب في خطوبة مخبوطة في حد ذاتها ..
ولكن العجب يكمن في مواصفات عريسها ..
حيث انه طالب للدكتوراه في مجال الاجهزة الطبية يبلغ الثلاثين
لديه شقة مجهزة بأفخم الاثاث
وهو ما لم نعهده في عرسان مخبوطة القادمين من مستشفيات الامراض العقلية .. وهنا نسأل مخبوطة :


- مخبوطة ... ماذا تتوقعين من نتيجة المباحاثات التي تجري حاليا بين العريس وامه ؟
( أرد عليه بقى وانا متقمصة دور عمرو موسى  )
- الحقيقة احنا متواصلين مع اطراف النزاع .. أأأ ... قصدي مع ام العريس وقريبتي اللي جرجرتها ... وهنحاول نتوصل لصيغة كويسة لهذه المبادرة العرسانية ان شاء الله ترضي الطرفين ..
- هل تتوقعون ما هو اسوأ .. كأن العريس يطلع شبه امه مثلا ... ؟
- احنا طرحنا كل الاحتمالات على الجدول الزمني المخصص لخارطة الخطوبة دية .. ولا اعتقد ان شبهه بوالدته هيكون له تأثير في فشل هذا المشروع ..
- ولماذا لا تتوقعين ان يكون له تأثير بحكم ان القبول شرط اساسي لانجاح هذه المبادرة ؟
- لأن سن احد الاطراف .. اللي هو حضرتي .. احم احم .. لا يسمح لي برفض العريس عشان سبب كهذا ..
- هل هذا يعني انكم تتبعون مقولة.. زي ما يطلع يطلع ؟!
- طبعا !! .. أأأ .. قصدي يعني .. بالتأكيد هندرس القضية مع الاطراف المعنية وسنتخذ القرارات المناسبة ..



يا مخبوووووطة يا جااااااامد 
ياللي بتعرفي تزوغي من اسئلة المراسل الرخم بدبلوماسية
ما تخرش المية..
طبعا !
مش متقمصة دور عمرو موسى !


وفتحت مخبوطة عينيها
يااااااه .. امتى ييجي اليوم ده ... متخيلة الحبايب والقرايب وهما قاعدين قدام التليفزيون وبيتفرجوا وبيفركوا في ايديهم وبيمصمصوا في شفايفهم ..

شعور اكسلانت صراحة



قريبتي لام العريس : ايه رأيك في البنت ؟
ام العريس : ماشاء الله ما تتعيبش ربنا يجعلها من نصيبنا ..
- يعني نحدد يوم عشان الدكتور ييجي يشوفها ؟
- لا .. أأأ .. آه .. يعني هروح اكلمه الاول واشوف هو فاضي امتى وان شاء الله هتصل بيكي واقولك ..
- ان شاء الله


وفات يوم .. واتنين .. وتلاتة .. واسبوع ..
وام العريس لا حس ولا خبر 
قريبتي اتصلت بيها تشوف هما غطسوا فين

ماهو احنا لازم نفضل نطاردهم ونحاصرهم لحد ما تيجي الكسفة منهم .. آه .. نعمل اللي علينا وزيادة
عشان ننام وضميرنا مستريح


- قررتوا ايه بخصوص البنت ؟
ام العريس : لا خلاص مفيش نصيب ..
- ليه بس .. دي مخبوطة بنت حلال وكويسة ؟
- ظروفنا ما تسمحش دلوقتي


اخصصصصصصصص !! 
يادي الكسفة ...
انا بقدم اعتذاري لقناة الجزيرة وجميع العاملين فيها على سوء التفاهم اللي حصل
ايم سوري ياجماعة



وكالعادة يا خوانا
العريس السابق اتجوز وخلف وعاش حياته عادي
لأن سن التلاتين بالنسبة له طبعا يسمحله بالزواج ممن يشاء
مش متضرر منه
مش زينا احنا .. مجتمع ندل صحيح !!


لحد ما جت الصدفة .. و وحدة معرفة طلعت زميلة العريس ده في الشغل .. وجه حضرته يفكرها بأمجاده القديمة وشهامته المفرطة هو وامه في التعامل مع بنات الناس .. وسألها :


- انتي تعرفي فلانة ؟
- ايوة .. انت كنت متقدملها صح ؟
- ايوة ومحصلش نصيب
- ممكن اعرف ايه السبب ؟
- امي قالتلي انها متكبرة .. وقاعدة مكشرة طول الوقت ودمها تقيل .. وشايفة نفسها عشان بتعمل ماجستير وهتتعبنا معاها
- لا والله الشهادة لله البنت مش كده خالص ! .. دي ظريفة جدا !!
- ظريفة ايه والدتي قالتلي ان البنت ما احترمتهاش لما راحت تشوفها !
- هه ؟؟!!!



واتخنقت مخبوطة من هذه الأخبار ..
اللي ترفع الضغط وتفرقع الفشار
ليه ام العريس
تقول اني ما عبرتهاش ... واني كشرت في وشها
وحبة احترام ما اديتهاش ...
كل ده عشان مخبوطة واعية .. وبتعمل ماجستير ودراسات عالية
هتقولهم ده حقي ومش حقي .. وما يقدروش يتحكموا فيها
ويا داهية دقي


وحطت مخبوطة ايدها على خدها .. بتفكر في امهات العرسان اللي بتتقدملها
داعية ربها ساعة فجرية .. يخلصها من هذه النوعية
اللي كانت السبب
في خيبتنا العربية القوية
 


ـــــــــــــــــــــ


انتزروني

هناك 15 تعليقًا:

  1. ههههههههههههههه


    عسل يا ناس

    ايه الحوار الجامد ده يا عم ^-^

    اما ام العريس بصراحه عايزه بوكس في عينيها عشان بعد كده لا تشوف خير ولا شر


    يلا يا بنتي ربنا خلصك منها دي كدابه


    في انتظارك

    ردحذف
  2. واضح ان ام العريس كانت عايزة لابنها المحروس واحده معندهاش شخصيه تقدر تتحكم فيها وتمشي كلامها عليها ولما لقيتك انسانه واعيه ومثقفه عرفت انها مش هتقدر تتحكم فيكي فألفت الكدبه دي عليكي عشان تخلي ابنها يصرف نظر ...
    يا ستي خد الشر وراح يغور بامه الكدابه دي
    ربنا يعوض عليكي بأحسن منه يا مخبوطه...

    ردحذف
  3. ماهو مادام هيسكن في نفس العمارة يبقا لازم تكون الزوجه المصون علي كيف حماتها اللي من النوعيه دي

    بس في حماوات طيبات جدا وكويسين

    هي قالت ماجسيتيك ايه:)))
    هي عايزة واحدة تيجي تخلف مش تذاكر
    :))

    عندي فزورة في المدونه ياريت تيجي تحليها
    :)))

    ردحذف
  4. فتش عن المرأة :)))

    تحياتى

    ردحذف
  5. هايل هايل بجد رائعة
    وان شاء الله نشوفها كتاب عن قريب

    ردحذف
  6. سوسه وبس كي منافقه و خداعه الله يهدي

    ردحذف
  7. الله يعينك ويس امرك ويرزقك الزوج الصالح والذرية الصالحة المصلحة يارب

    ردحذف
  8. على فكرة انا من متابعات قصتك وحكايتي قريبة من حكايتك في بعض الاحيان يلا الله بيعين

    ردحذف
  9. اهلا يا د. ولاء ميرسي لمتابعتك ربنا يكرمك ... مبسوطة ان الحوار عجبك هههههههه ... احيانا بيبقى اعلان خبر الخطوبة اهم من الخطوبة نفسها ههههههه

    منورة البلوج

    ردحذف
  10. كلامك صح يا بنفسج .. مفيش ام عريس في الكورة الارضية عايزة تجوز ابنها وحدة عندها شخصية او عارفة حقوقها ... الكل عايز بنت يستغلها اسوأ استغلال ... وده احد اسباب رفض الناس للبنت اللي كبرت ونضجت ... وعشان سن التلاتينات سن اكتمال النضوج بقى مرفوض .. عشان هتكون شخصيتها اتكونت وبقى عندها مبادئ واراء وبتعرف ازاي تاخد حقها .. عكس البنت اللي بتكون في اوائل العشرين


    منورة المدونة يا بنفسج اسعدني تعلقيك

    ردحذف
  11. شمس النهار اهلا بيكي ... كلامك حكم ... فعلا عايزة وحدة تخلف مش تزاكر ..

    انا دخلت مدونتك يا شمس جميلة جدا لكن للاسف كل ما اكتب تعليق مش بيطلع ... معلش بقى انا جديدة في البلوجر استحملوني شوية ...

    ردحذف
  12. استاذ فوكسولوجي واستاذ مجدي اهلا بيكم سعيدة بمتابعتكم وتعليقاتكم ... اهلا بيكم فيري متش

    ردحذف
  13. غير معرف تقبل الله دعائك وبارك فيكي ... كتير قالولي ان حكاياتي فيها تشابه من حكياتهم وبصراحة الكلام ده بيحفزني اكتر لأن فعلا المشاكل دي بتمس بنات كتير والمعاناة المخفية في كواليس الصالونات زادت عن حدهاوقليل ما البنت تتكلم .... عشان كده حبيت اكتبها بتفاصيلها عشان الناس تعرف بيحصل ايه في بنات الناس

    ردحذف
  14. سحر عيون اسكندرية5 أكتوبر 2012 في 7:31 ص

    سبحان الله كل شاء قسمة ونصيب لا تحزنى اكيد العريس دة مفيش خير فية لان ربنا علم بيك وان شاء الله يوعدك قريب بشخص يعرف الله بالتوفيق

    ردحذف
  15. قصتك قريبه لقصتي جدا جدا اقولك ايه؟و الله مامته برضه كانت السبب الفرق يا بنتي ان هو كان يعرفني من سنه مش لسه مشفنيش و مشي علي كلامها و قالك انا شايفها اختي يعني اقنعته بحاجه هو مش شايفها اصلا و هو و الحمد لله معندوش شخضيه مشي ولرا كلامها و سابني يلا في داهيه ربنا يعوضك و يعوضني خير ان شاء الله خيرها في غيرها :)

    ردحذف

back to top إخبط لفوق