إجمالي مرات مشاهدة الصفحة

الأحد، 26 ديسمبر 2010

بيغير من العيلة الصغيرة !!


جائني يا قراء يا كرام .. أنه وفي احدى الايام
اكتشفت البت مخبوطة ..
صفات في خطيبها الدكتور البخيل .. تقصر العمر الطويل
وتتعب الصحة وتهد الحيل


لما كانت بنت اخت مخبوطة الصغنونة
بتحب تتكلم في التليفون
وتقول آلو لكل متصل .. بينتظر على الخط ومنشغل


تررررن تررررن


خطيبي : الو ازيك
- الحمدلله ازيك انت ؟
- انا الحمدلله .. بتعملي ايه ؟


في اللحظة دي جت الانسة بنت اختي
نونو صغيرة عندها سنة ونص .. لمحتني ماسكة السماعة ..
وبما انها مهووسة بالتليفون ..
يبقى لازم تمسك السماعة وتلخبط اي كلام في بعضه
وترجعهالي تاني
يا كده .. يا زن وعياط وصداع ويومنا مش هيعدي


جت البيبي وقفت جمبي وقالتلي : بتكلمي ألو ؟
قلت لباسم : ثواني .. ورديت عليها : ايوة يا حبيبتي بكلم عمو باسم .. 
النونو : انا عايزة كلم أمو ..
خطيبي اتعصب : انتي سايباني وبتكلمي مين ؟!
- دي بنت اختي الصغيرة عايزة تكلمك ..
قام مزعق : مش عاااااااااااايز اكلم حد ... هو انا لحقت اتكلم معاكي ! .. ولا انا متصل عشان اكلم العيال ؟؟
( ايه الجنان ده ! .. )


- ايه يا باسم دي طفلة !
- هو انا عارف اكلم الكبيرة عشان اكلم الصغيرة !
- بلاش يا باسم ما تكلمهاش .. روحي يا نونو يا حبيبتي معلش عمو مش عايز يكلمك ..
( يمكن يحس قد ايه هو سخيف !  )
- البنت مشيت ؟
- ايوة
- طب كويس ... المهم ... وحشتيني
( الواد ده محتاج نقل دم فورا ... معندوش دم خالص !!! )
- طيب ..
- طيب ! .... ايه يا مخبوطة انتي اتدايقتي ؟
- لا ابدا هو في حاجة تدايق ؟!
- بتكلميني كدة ليه ايه اللي حصل ؟؟
- انت مش شايف نفسك بتزعق ازاي ؟! كل ده عشان قلتلك كلم البنت كلمتين !! ... دي عيلة صغيرة يا باسم وبتحب تتكلم في التليفون .. تكسفني وتكسفها كده ! انا مش قادرة اصدق ردة فعلك دي انت بتكره الاطفال اوي كده ؟؟؟؟!
- لا يا مخبوطة اوعي تاخدي عني فكرة غلط .. بالعكس انا بحب الاطفال جدا ..
- آه ماهو باين ..
- طب هاتيها اكلمها ..
- لا مش هتكلمها
- طيب براحتك ..
- مع السلامة عشان عايزة اروح الحمام
- كده ؟ .. طب هكلمك بعدين ..
- سلام
- سلام


ايه الوقعة المهببة دي يا بت يا مخبوطة !
دي اشكال تتخطبيلها ؟
ازاي يكرش البت ويشوف صوتك اتخنق وانتي بتتكلمي
وليه نفس يعيش دور الرومانسي !


هما شبان الايام دي مالهم كده ؟!
ياترى ايه السبب الرئيسي في ارتفاع نسبة العبط
في صفوفهم ؟ ..
واللي بدورها أدت لارتفاع نسبة العوانس !
الشيبسي ؟ .. ولا الفاست فود ؟ .. ولا السجاير ؟!
ولا دلع امه الزايد فيه


عموما يا مخبوطة
واضح انك لو استمريتي في الخطوبة الفاشلة دي ....
هتكون النهاية حاجة من الاتنين ..
يا اما خطيبك ده هيتوفى بحقنة هوا ..
تديهاله مباشرة في قرعته
يا اما هتموتي متشنجة وبؤك مشدود على جمب
قبل ما تكملي معاه اسبوع جواز ..
وشهر العسل يتقلب لشهر الشلل .. والناس تيجي تباركلك في المستشفى
بصراحة .. مشهد مأساوي جدا يا مخبوطة


في الأوضة :


اختي : مخبوطة .. ايه اللي بيعمله خطيبك ده ؟ باين عليه مجنون .. ؟
- باين عليه ؟ ده مجنون رسمي !
- مش يمكن متدايق من حاجة تانية ؟
- لا لا .. هو كدة ماعندوش من الأحمر 



لا يا مخبوطة ...
كل انسان يحتوي جسمه على عدد لا بأس به من ليترات الأحمر
انما اللي عند خطيبك ده .. اسمه مرض نفسي !
بيطلع عند الشبان اللي امهاتهم مدلعاهم زيادة
ومعوداه على الانانية .. وان كل حاجة بتبقى بتاعته لوحده
وآدي النتيجة


بقينا مش لاقيين رجالة عاقلين نتجوزهم !!
يا نتجوز مجانين يا نقعد من غير جواز خالص !
طب نعمل ايه !


يا بنات الوطن العربي ...


احب اقولكم ...













احنا في ورطة
مشهد اخر ..


خطيبي لازق عندي في الصالون كالعادة ..
ودخلت بنت اختي الصغيرة مكسوفة ..
البيه لما شافها بلم وسكت .. وكأنها حد كبير


قمت قلتلها تعالي يا نونو يا حبيبتي ..
جت جري عليا فرحانة .. حملتها وقعدتها على رجلي
مسكينة مش عارفة ان عمو الدكتور الاقرع خطيب خالتها ...

حاطط نقره من نقرها


خطيبي : ايه ده دي مش لابسة بامبرز !
انا : عادي مش مشكلة ..
- طب ما تخلي امها تاخدها تلبسها بامبرز بدل ما تعملها عليكي
- لا هي شاطرة مش بتعملها الا في الحمام .. صح يا نونو ؟
النونو : ثح ..
ضحكت مخبوطة على طريقة كلام البيبي الصغيرة ....
خطيبها اتغاظ ولونه اتغير ..
وكأنها بتضحك مع راجل غريب ..
مممم
على كده كمان عشرين سنة .. الراجل اللي يشوف مراته بتلاعب بيبي صغير مش ابنه ...
هيطلق عليها الرصاص وتبقى جريمة شرف ؟



خطيبي : ايوة يا عم .. شكلك بتحبيها اوي
- ايوة طبعا دي زي بنتي
- آاااه .. يعني لما نخلف هتحبيها اكتر من عيالنا !
( حقنة هوا يا مخبوطة في قرعته بسرعة ... بسرعة )
- لا مش اكتر .. هحبها زي عيالي بالزبط
- طيب يا ستي .. يا بختك يا نونو هانم .. اظن خلاص كده خليها تروح عند مامتها ..
- هي مدايقاك في حاجة ؟
- لا يعني عشان ناخد راحتنا ..
- محنا واخدين راحتنا اهو .. وبعدين هو احنا بنعمل ايه غير اننا بنتكلم ؟
- يعني ينفع اقعد اتكلم في كلام رومانسي وهي موجودة ؟
- وانت بتسمي الخناقات والنقار بتاعنا طول الوقت ده كلام رومانسي ؟
- طبعا ده ملح الخطوبة !
- ملح لما يكون كل فين وفين .. مش كل شوية
- الخلاصة مش عايزة تسيبي البنت ؟
- لا




و بص خطيب مخبوطة للعيلة الصغيرة بصة مش اللي هي ...
من فوق لتحت كده بطريقة حاقدة وغلاوية
ومن ساعتها وهو بيغير منها
ويتأفف من سيرتها
ولما تيجي البت .. يدور وشو عنها


كأنها راجل وهتخطفني منه ... أو عدو لدود هيبعدني عنه
باين عليه يا مخبوطة انسان مش كويس ...
لأن اللي بغير من عيلة صغيرة
ده اكيد واحد متيس


وحطت مخبوطة ايدها على خدها .. بتفكر في نفسية الواد
اللي خطبها
داعية ربها بعين مدمعة .. يخلصها من هذا الدكتور البخيل
ابو قرعة ممسوحة وملمعة .. وعقلية مريضة ومطرقعة


ـــــــــــــــــ


انتزروني

هناك 22 تعليقًا:

  1. بجد كتيييييييير
    يا مخبوطة زاد
    من العيلة الصغيرة
    تسلم ايدك
    بجد جميلة جداً

    ردحذف
  2. والله كويس انك خلصتي منه لو اتجوزتوا كان ممكن يخيرك ويقولك يانا يابنت اختك ههههه

    ردحذف
  3. ده اناني سيكوباتي

    غيووووووور

    كويس انه اخد استمارة 6

    :)))))))

    ماجتيش رديتي علي الفزورة ليه؟؟؟؟

    :)))))

    ردحذف
  4. سلسبيل الله يسلمك ويكرمك يارب .. كلك ذوق

    ردحذف
  5. بنفسج ههههه .. استني الحكاية الجاية هتلاقي انه بيغير من حاجات غريبة كمان .. انتزريني

    ردحذف
  6. شمس منورة ... ازاي يا شموسة انا كتبت حل الفزورة أاااد كده تعليق طويل وعريض .. ده انا فضلت وراه لحد ما شفته بين التعليقات ...الظاهر اني نزلته في بوست غلط :( .... خلاص هكتبه تاني ان شاء الله

    ردحذف
  7. ههههههههه
    لا حول ولا قوه الا بالله

    ردحذف
  8. ههههههههههههههه

    فى ناس كتيرة كدة معلش :))

    ردحذف
  9. لا ده بقى ابعدي عنه ولو هو مين

    اذا كان بيعامل كده الاطفال

    امال هيعاملك ازاي

    في انتظارك يا عروسه

    ردحذف
  10. جميلة جدا
    سرد ممتاز فعلا
    وحاجة غريبة جدا ان حد يغير من طفل صغير

    ردحذف
  11. ايه ده ؟؟؟ ده انسان مش طبيعى بالمرة ولو ان ابرة الهوا بالنسبة له كانت دوا ههههههه

    تحياتى ليكى يامخبوطة زاد

    احمد البطل

    ردحذف
  12. ههههههههههه

    فعلا يا مخبوطه .. واضح إن البنات فى ورطه :D

    ردحذف
  13. د. هند واخ فوكسولوجي شكرا لتعليقكم ربنا يبارك فيكم

    ردحذف
  14. د. ولاء ازيك يارب تكوني بخير ...
    انا عروسة ؟؟ هههههه .. ربنا يسمع منك .. منورة المدونة يا دكتورة

    ردحذف
  15. اهلا يا استاذ مجدي ربنا يكرمك ... كلك ذوق ... عموما في الزمن ده المريضين نفسيا بقم كتييييير ... واستنى حضرتك القصص الجاية هتلاقي انه بيغير من حاجات هبلة اكتر كمان ....

    ردحذف
  16. اخ احمد البطل اهلا اهلا بحضرتك ولونها متأخرة ... ميرسي لمشاركتك وقرايتك للحكايات ... حضرتك لو هتتابع معانا هتشوف العجب ... فعلا شبابنا العربي مدمر نفسيا .... نورت المدونة

    ردحذف
  17. مها اهلا بيكي وشكرا لتعليقك ... ورطة كبيرة الحقيقة هههههه .... يلا ربنا يفرجها

    ردحذف
  18. السلام عليكم

    ازيك يا مخبوطة ؟ يارب تكوني بخير انتي وكل المخبوطات هنااااك

    وحشتوني واعذروني

    سلامي ليك ولكل قبيلة الخبط

    ردحذف
  19. مفقووووووصة .... فييييينك واخبارك ايه وحشتينا والكل بيسأل عليكي ... انا الحمدلله ادينا عايشين ... هو ايه اللي حصل مش ناوية ترجعي بقى :(

    خلينا على تواصل هنا على الاقل

    ردحذف
  20. هههههههههه حلوة اوي

    ردحذف
  21. منتهى الروعة تسلم ايدك

    ردحذف

back to top إخبط لفوق