إجمالي مرات مشاهدة الصفحة

الثلاثاء، 21 ديسمبر 2010

أنا شامة ريحة !!


جائني يا قراء يا كرام .. أنه وفي احدى الايام ..
البت مخبوطة كانت خارجة تتسوق .. هي واختها ومرات اخوها
عشان تغير جو وتتروق
وأثناء اللف على المحلات .. والدخلة والخرجة من البوتيكات
توقفوا عند محل آيس كريم وحلواني
عشان يرتاحوا شوية
ويرجعوا للف في السوق من تاني


ولما راحت اختها توصي على الطلبات
جت وحدة ست ومعاها بنت صغيرة
وسألتها بدون اي مقدمات


الست لاختي : لو سمحتي .. عايزة اسألك ..
اختي : ايوة اتفضلي
- انتي مخطوبة ؟
- لا ..
- عايزة اتكلم معاكي .. ليا اخو جوزي مهندس وبيدور على عروسة حلوة .. وانا لما شفتك اعجبت بيكي .. انتي كم سنة ؟
- 18 .. هو عندو كم سنة ؟
- 33 .. بس مش باين عليه خالص .. لو شفتيه تقولي عنده 25 سنة ..
( اختي لمعت عينيها لمعة اللي جاتله فكرة جهنمية .. انها تحول مسار هذا العريس الثلاثيني لمخبوطة  )
- انا لسة صغيرة ومش بفكر في الجواز دلوقتي .. لكن ليا اختي عندها 30 سنة ..
- واختك امورة زيك ؟
- هي معانا هنا تقدري تشوفيها ..


بعد شوية ..
بلاقي اختي جاية وجايبة معاها الطلبات بتاعتنا ..
ومعاها ست كده شكلها مدام .. وبنت تانية صغيرة تيجي 15 او 16 سنة ..
مين دول !
الست وقفت بصتلي انا ومرات اخويا .. وقالت لاختي :


- مين اختك فيهم ؟
اختي شاورت عليا وقالتلها : .. دي
الست بصتلي وقالت :
- ماشاء الله ..
البنت الصغيرة قالت ببراءة : الله حلوة


هو في ايه ؟!
انا شامة ريحة .. ريحة شميتها قبل كده كزا مرة ..
ريحة مش غريبة عليا
ريحة ايييييه يا مخبوطة .. ريحة ايييييه يا مخبوطة


طبيخ حمضان ؟؟


لا لا ..

حاجة تانية


زبالة قديمة ؟؟؟؟


برضو لا


مممممم


بيض متعفن ؟؟؟؟



لا لا لا  


ممممممممم


ايوة !!


ايوة ايوة ايوة !!!


وجدتهاااااا


ريحة عريس صالوني ... ايووووة هي دي


افيييييييييييه !
وده وقت العكننة دلوقتي !


بصينا انا ومرات اخويا على الست دي ..
واحنا فاتحين بؤنا ونظرة الغباوة تتراقص في اعيننا
لكن مرات اخويا خرجت من الحالة دي بسرعة وسألت الست :


- مين حضرتك ؟
- احنا من العيلة الفلانية .. واخو جوزي مهندس وبيدور على عروسة وتعبنا معاه .. واللي معايا دي اخته ..
( انا قلت كده برضو .... حاسة الشم عندك لا تخيب يا بت يا مخبوطة  )
مرات اخويا : طب هو محدد سن معين للعروسة ؟
الست : لا هو اهم حاجة عنده ان العروسة تعجبه
- طيب ربنا يجيب اللي فيه الخير ..
الست : ان شاء الله ..
والتفتت لاختي وقالتلها : طب انتي مش عايزة تتجوزي دلوقتي ليه ؟ عادي عندنا بنات اصغر منك وبيتجوزوا !!
( آاااااه الظاهر كده ان عينها من اختي )
اختي : انا لسة بدرس وما بفكرش اتجوز دلوقتي ..
مرات اخويا : ليه هو العريس كم سنة ؟
الست : يعني 33 او 34 ..
- طب ده تناسبه اللي عندها 30 مش 18 !


سكتت الست شوية .. حست ان مرات اخويا واختي عايزين يلزقوني انا للعريس ده بأي شكل
ثم تداركت الموقف وقالت :


- انتوا ادوني رقم تليفون البيت ونتفق تيجي مامته عشان تشوف الآنسة ..
( احم احم .. قصدها انا يعني .. الظاهر ان خطة تحويل مسار العريس باتجاهي جابت نتائجها المطلوبة  )


مرات اخويا ادتها الرقم ..
الست خدته منها و سلمت علينا بحرارة وكإننا خلاص بقينا نسايب ... ومشيت ..
كل ده ..
وانا لسة فاتحة بؤي ونظرة الغباوة لا زالت تتراقص على مقلتي


انا : انتوا ايه اللي عملتوه ده !
مرات اخويا : ايه ! عريس ونزل علينا من السما !! نقوله لا !
اختي : يا بت احمدي ربنا ده مش حاطط شروط على السن ! .. هتلاقي زيه فين !
مرات اخويا : ومهندس .. ومن لبسهم باين عليهم ولاد ناس .. خامة نضيفة !
اختي : نلحقه قبل ما غيرنا ياخده !


هو احنا هنشتري خلاط ولا ايه !
طيب .. لعله خير
روحنا البيت وماجبناش سيرة لحد عن هذا العريس المفاجئ
كإجراء أمان ضد المقالب .. عشان لو طلع مقلب ..
ما نجيبش لنفسينا احراج قدام الاسرة الكريمة


وبعد يومين .. جت ماما تصحيني من النوم


ماما : مخبوطة .. مخبوطة ..
انا : ايوة يا ماما .....
- انتوا لما خرجتوا في ناس كلموكوا على ابنهم وانتوا اديتوهم الرقم ؟
- ايوة .. عرفتي منين ؟
- في ست اتصلت وقالت انها عايزة تشوفكوا
- تشوفنا ؟ ..
- انا قلتلها لو عايزين تتفضلوا عشان البنت الكبيرة يبقى اوكي .. والست وافقت على كده و بكرة جاية .. يمكن ده نصيبك يا مخبوطة ونخلص من الهم ده بقى ... انا متفائلة اوي ..


انا مش عارفة انتوا بتجيبوا التفاؤل ده منين ؟
انا بقى كل ما احاول اتفائل .. بلاقي حرارتي شاطت
والعرق يتصبب .. والهلوسات الليلية تشتغل ..
واخرتها رقدة في المستشفى ومحاليل وحقن ..
وزيارات وبوكيهات ورد
اخر بوكيه ورد جالي لما عييت من اخر تفاؤل حصلي
كان معاه كرت مكتوب عليه حكمة مؤثرة ..
عينيا رغرغت بالدموع لما قريتها :

ياللي آمنت للمجتمع الندل وبقيت تتفائل ..
لما تقع على بوزك ..
اعرف ان بوزك كان للوقعة يستاهل




مرات اخويا قاعدة قدام الكمبيوتر : مخبوطة ... شايفة خلطة الماسك دي ؟؟
قربت من الكمبيوتر : ضعي القليل من ماء الورد واخلطيه بزيت الزيتون واعصري ليمونة و .... يوووه .. لسة هنقعد نخلط ونعصر !
- وماله ! ... دي بتشيل الخلايا الميتة في البشرة وبتنضفها ..


وبعد دقايق .. كانت مخبوطة قاعدة تحت المروحة
بتستنى الماسك السحري ينشف
واختها بتبردلها في ضوافرها ..
ومرات اخوها بتسرحلها في شعرها


بحس اني نجمة في اليوم ده
أأ .. عشان نكون حقانيين يعني ..
الاحساس ده بيكون في النصف الاول من اليوم بس
انما النصف الاخير ... بعد ما ام العريس تمشي
الاحساس بالنجومية بيختفي
وبيحل محله احساس المواطن العربي الغلبان وهو واقف في احدى مطارات دول الخليج منبوذاً

ودقت ساعة الصفر
وصلت ام العريس ومرات اخوه اللي شافتنا في المحل
خرجت مخبوطة تسلم عليهم
وهي تمشي مشية نجمات هوليوود على السجاد الأحمر


ام العريس : ماشاء الله .. ازيك يا امورة ؟
- الحمدلله يا طنط
مرات اخو العريس عمالة تبصلي ومستغربة .. وقالت : انتي كنتي معاهم يوم ما قابلت اختك في المحل ؟
انا : ايوة
- شكلك متغير اوي !
مرات اخويا : عشان من غير حجاب ..
ام العريس : ابني حلو وعايز وحدة حلوة زيك كده .. شكلنا كده ربنا بيحبنا
( يختي عليه الننوس !! )
مرات اخو العريس : طب واختك فين ؟
انا : في اوضتها ..
- كنا عايزين نسلم عليها ..
( والتفتت مرات اخو العريس لحماتها وغمزتلها .. )
فقامت ام العريس قايلة : آه ياريت .. انا حابة اتعرف عليها هي كمان ...


انا شامة ريحة ..


ريحة ايييييه يا مخبوطة ريحة ايييييه ؟؟


صرصار مستحمي في بلاعة ؟


لا


مممم .. عرسة ميتة في طور التحلل ؟


لا لا


طب مجاري طافحة ؟


برضو لا ..


مش عارفة ...
هي تقريبا ريحة حاجة واطية كده ..
قلة أصل .. خيانة .. حاجة كده دون المستوى ..


ريحة اييييه ريحة اييييه ؟؟؟


ايوة ...


ايوة ايوة ايوة !!


ندالة ..
هي دي .. في ريحة ندالة فاحت من ماسورة المجتمع


ماما : اصل البنت عندها امتحان بكرة وقاعدة بتزاكر ..
مرات اخو العريس : اصلها وحشتني وحبيت اسلم عليها ... دقايق بس مش هناخد من وقتها كتير ..
( ايه وحشتك دي !! هي كانت صديقتك منذ الطفولة ولا ايه !!  )
ماما : من الآخر كده .. البنت الصغيرة مش للجواز
ام العريس : ليه يعني هو مفيش بنات بيتجوزوا في سنها ؟
- احنا ما بنجوزش بناتنا في السن دي
مرات اخويا : حتى لو في .. هي شايفة انه33 كبير عليها !
ام العريس : انا ابني 28 مش 33
( ايه !! )
مرات اخويا التفت على مرات اخو العريس مصعوقة : مش انتي قلتي ان هو عنده 33 ؟؟؟؟؟
ام العريس : هاهاها .. لا دي مش عارفة عنده كم سنة ..


ايه ده ! ... ازاي يعني مرات اخوه وبتدورله على عروسة
ومش عارفة عنده كم سنة !!


طب فلاش باك كده ..


مشهد مرات اخو العريس وهي واقفة في محل الآيس كريم
وبتقول ان العريس عنده 33 او 34 سنة ..
واخت العريس الصغيرة واقفة جمبها


ممممم ..
طب اذا كانت مرات اخوه مش عارفة عمره وقالتلنا عمر غلط من غير ما تقصد ..
اخت العريس اللي بتربطها بيه قرابة من الدرجة الأولى
ما قالتلهاش ليه ساعتها ان اخويا عنده 28 مش 33 !
ولا مش عارفة عمره هي كمان ؟!


ام العريس : والله انا عجبتني مخبوطة .. بس الولد مش هيرضى ياخد وحدة اكبر منه .. ممكن بقى نشوف البنت التانية ؟
ماما : حتى لو مفيش نصيب مع مخبوطة .. البنت التانية كده كده مش هتتجوز دلوقتي .. لسة صغيرة وقدامها دراستها !
( ام العريس ومرات اخوه بصوا لبعض .. )
قامت مرات اخوه قايلة : طب نسلم عليها بس .. مجرد سلام مش اكتر .. مش عشان جواز ولا حاجة !
مرات اخويا : مش هترضى ..
ام العريس : يا ستي مش عايزين نشوفها للجواز .. انا مش همشي الا لما اشوفها ..


الظاهر كده
ان الجماعة دماغهم هنجت ولسانهم علق على كلمة
عايزين نشوفها عايزين نشوفها


طيب ..
بما ان العريس دلوع امه طلع اصغر مني ..
وطبعا مستحيل يتجوز وحدة اكبر منه ..لأن اللي بيتجوز وحدة اكبر منه بسنتين بتجيله حصبة
قلت اما اقوم من هنا احسن .. احتراما لنفسي ..
ولبشرتي المضيئة بفعل الماسك ..
وشعري المتسرح ..
وضوافري المنسقة والملونة .. وشياكتي ..
ومشية نجمات هوليوود


انا : طب استأذن .. فرصة سعيدة يا جماعة
ام العريس حست اني زعلت : ايه على فين ؟؟؟؟
- معلش يا طنط ورايا حاجات عايزة اعملها ..


وبما ان هناك فرق كبير بين مشية داخل الحمام ..
ومشية الخارج منه ..
يبقى بالتأكيد في فرق كبير
بين مشية نجمات هوليوود الواثقة من نفسها ..
ومشية الراكب على حمار أهزل .. يمشي على ثلاثة كمشية العرنجل


الله يرحمك يا أونكل أصمعي .. زي ما يكون قلبك حاسس


وبعد ما دخلت الأوضة ..
سمعت صوت ام العريس يقترب ... يقترب ... ويقترب
لا لا .. مش معقولة ..
بقى انا طفشانة من الصالون بعد ما ماسورة الندالة طفحت فيه ..

تيجولي لحد هنا !!


وفجأة ....
بلاقي ام العريس واقفة عند باب الاوضة
انتي هنا بتعملي ايه يا ولية ..!



ام العريس : هو الحمام منين ؟
ماما واقفة وراها : قلت لحضرتك من هنا .. اتفضلي
ام العريس طنشت ماما ودخلت الاوضة وبصت على اختي اللي كانت قاعدة قدام الكمبيوتر وقالتلي : هي دي اختك الصغيرة ؟
انا : ايوة هي دي ..
ام العريس بصت لاختي من فوق لتحت وقالت : طب هستأذن يا جماعة .. فرصة سعيدة
ماما : مش عايزة الحمام ؟
ام العريس : لا خلاص مش مشكلة ... والله انا حبيتك يا مخبوطة .. انتي باين عليكي بنت كويسة .. ربنا يعوضك خير


هي مالها كده بلمت ؟ وشها بقى ألوان ! ..
شوية شوية وتعيط
عيطي .. ماهو الحق عليكي
ماما قالتلك اتفضلي روحي الحمام وانتي اللي عملتي فيها جدعة

وقلتي لا مش مشكلة !


أأأأأ.. اه .. اسفة .. اسفة اسفة ..
الظاهر اني فهمت انفعالها غلط


الست حاسة بالندم على فعلتها الدنيئة مع مرات ابنها
وانهم كدبوا علينا في سن العريس عشان يطلعولي الكرت الاحمر وتدخل اختي بدالي الصالون

وقربت عليا وباستني ..
كنت عايزة اردلها هذه القبلة بعضة تنسف خدها اليمين ..
وتمشي في الشارع بخد واحد


خرجت ام العريس من الاوضة تمشي نفس مشية العرنجل اللي مشيتها من شوية
وبصت لمرات ابنها بصة كلها وعيد وتهديد


مرات ابنها : شفتيها ؟
ام العريس : ايوة .. والتفتت لماما : ربنا يحفظلك بناتك .. بالاذن ..
ماما : طب اشربوا الشاي يا جماعة ما يصحش !
ام العريس : معلش العربية مستنيانا تحت
مرات اخو العريس : .. ومخبوطة ؟
( ايه ده ايه ده !  ... مرة لا عايزين نشوف اخت مخبوطة .. لما اخت مخبوطة ما عجبتش حماتها طب نرجع لمخبوطة تاني .. هي مخبوطة واختها معيز وانتوا جايين تشتروها ولا ايه !! )
ام العريس : ربنا يعوضها خير .. مع السلامة يا مخبوطة
( امشي انتي وهي اطلعوا براااا ... براااااااااا ... براااااااااااااااااااااااااااااااا )
انا : هه ؟ .. اه .. مع السلامة


وخرجت الست وهي مقهورة .. ومعاها مرات ابنها الغندورة
ما ينفعش تغير في سن ابنها تاني
وتطلع نفسها كدابة عشاني ..


وفيما بعد اكتشفت مخبوطة
ان ابنها فعلا عنده 33 سنة .. صحيح قلة اصل وجدعنة
ليه تقول لحماتها ان الصغيرة اجمل
ويضمروا الشر والكدب
ومش مهم الكبيرة .. بكرة هتتقبل
خليها تقعد من الصبح تلبس .. ولمقابلتنا تتزوق وتتهندس
ونديها في الاخر بومبة
ونخطب الصغيرة ونكسب اللعبة

وحماتها اقتنعت بخطتها .. ونفذتها معاها من حداقتها
قبل ما تشوف بعنيها ..
اللي سمعتوا من مرات ابنها الله يجازيها


ولما شافت اختي ولقتها رفيعة ما عجبتهاش ..
وقالت عجبتني مخبوطة
يا خسارة ما خدناهاش

 

صدق اللي قال واقتنع .. بان الطمع يقل ما جمع ..
سامع يا ندل يا مجتمع ؟


وحطت مخبوطة ايدها على خدها .. بتفكر في أهالي العرسان اللي بتتقدملها
داعية ربها ساعة فجرية .. يخلصها من هذه النوعية
اللي كانت السبب
في الخيبة العربية القوية


ـــــــــــــــــــ


انتزروني




هناك 19 تعليقًا:

  1. لا بصراحه دي قلة ادب اللي عملوه ده

    مفيش مراعاه لشعور البنات

    هو احنا معيز وبيبيعوا ويشتروا فينا


    احمدي ربنا انهم غاروا


    في انتظارك يا مخبوطه انتي والعاهات بتاعتك

    ردحذف
  2. حقى قصصك جميلة أووووووووى
    بتفكرنى بمسلسل عاوزة أتجوز
    تسلم أيدك حبيبتى بجد
    تحياتى لك

    ردحذف
  3. يالله ما أغلظ المواقف دي ... وبعدين اساسا اساسا المرأه كل ما بتزداد في العمر جملها بيزيد .. سيبك إنتي

    ردحذف
  4. ضحكتيني يا مها في الاول

    و عيطتيني في الاخير

    ربنا عالظالم المفتري

    اتاري كل ده حاصل ففلسطين

    و احنا فاكرين انها بلد الملائكة الطيبين

    بالله عليك يا مجتمع يا ندل

    بعد كل ده منين حنجيب النصر

    ردحذف
  5. بصراحه قله ذوق متناهيه
    وبعدين كمان تصمم تشوف أختك الصغيرة بالعافيه ...
    معلش يا مخبوطه هو موقف يزعل فعلا ومحرج ليكي فعلا...
    ربنا يعوضك باللي أحسن منه امين

    ردحذف
  6. ايوة يا د. ولاء البنات اللي كبرت بقى عادي ينداس على شعورها وكأنها فردة شراب قاعدة المهم ياخدوا اللي في دماغهم ... هنقول ايه حسبنا الله ونعم الوكيل

    ردحذف
  7. ميرسي يا سلسبيل على الكلام الجميل ده ... وعلى فكرة القصص دي حصلتلي حقيقي ... منورة المدونة اهلا بيكي فيري متش

    ردحذف
  8. فعلا يا مرام كلامك صحيح ... ده عمر اهل الجنة 33 سنة ... وعمر الاسلام ما قاس جمال المرأة بعمرها .. افكار غربية جت وسيطرت على مجتماعتنا ... محتاجين توعية كبيرة في الحكاية دي

    ردحذف
  9. ايه رأيك في الخنفشاريات الجديدة يا صوبحو ؟
    والله يا كركر المجتمع الفلسطيني اصعب مجتمع في الامور دي ... جوازات الصالونات هي الغالبة وكمان فيها تحقير كبير للبنات وبيدققوا اوي في حكاية السن اكتر من اي بلد ... ربنا يصلح الحال

    ردحذف
  10. منورة يا بنفسج .. عارفة ايه المشكلة في قلة الذوق دي ؟ ... ان الناس بقم شايفينها عادي .. لما تيجي تقولي لحد منهم يا ناس ده قلة احترام وجرح المشاعر بتتحاسبوا عليه بيستغربوا .. يقولولك ليه هو حد شتمك ؟! .. هو احنا مدينا ايدنا عليكي ... يعني الظلم تفشى لدرجة انه بقى عادي .. محتاجين حد يقول على الملأ ان ده حرام ومايرضيش ربنا

    ردحذف
  11. لا وكمان قايمه لحد باب الاوده وفتحتها
    لا بصراحه اوووووووووفر اوي
    ربنا يعوض عليكي

    ردحذف
  12. اه يا مخبوطه بالفعل اشكال تقرف ربنا يعينك عالعينات ذات الرائحه الغريبه ....عايزه اقولك انه طول ما مجتمعنا بيتعامل بالطريقه دي مع البنات عمره ما حيشوف الفرج لان البنات دول قوارير ورسولنا الكريم موصي بيهم ولانه مجتمعنا بعد عن الدين فده وضع طبيعي لحالنا ولو رجعنا للدين اكيد حالنا حيتغير ....الناس نسيت انه الدين المعامله ونسيت انه الدين الاخلاق ....
    ام العريس دي هي وكنتها المصونه عايزين حقنه هوا من الاصلي ....ربنا يعوضك بالخير

    ردحذف
  13. الماجستير المصغر (إدارة مالية) Mini MBA (FM)
    Mini Master of Business Adminstration in
    Financial Management
    تهدف شهادة الماجستير إدارة الاعمال المصغرة( إدارة مالية للتهيئة لسوق العمل وصنع مستقبل أفضل وأكثر تميزا

    تميز واعتمد نفسك دوليا
    شهادة معتمدة من جامعة القاهرة
    شهادة معتمدة من كلية أكسفورد oxford – لندن
    شهادة إتمام البرامج من شركة ميك للاستشارات والتدريب معتمدة دولياً من
    الإتحاد الدولي لمنظمة التدريب والتنمية (IFTDO ) سويسرا .
    مؤسسة التدريب والتعليم المهنى الدولية ( ITOL ) انجلترا .
    للحجز والاشتراك سجل بياناتك اضغط هنا
    http://mec4con.com/ar/reservation.php
    للاستعلام والاستفسار :
    0020224153473 - 0020224153483
    002012282922041 - 00201060211145
    ولمعرفة باقى برامجنا التدريبية وشهادات المهنية زورو موقعنا
    WWW.MEC4CON.COM
    كما يسعدنا تواجدكم على صفحتنا على الفيس بوك
    http://www.facebook.com/mec4con
    او راسلنا على
    s.training@mec4con.com
    marketing@mec4con.net

    ردحذف
  14. شركة ميك للاستشارات والتدريب
    تقدم
    الشهادة الاحترافية
    للسكرتارية وإدارة المكاتب CPOM
    Certified Professional Office Manager
    تهدف الشهادة إلى تكوين مهارات القيام بكافة اعمال الإدارة المكتبية ، وكذلك اعمال السكرتارية الخاصة والتنفيذية التي تتطلبها اعمال المكاتب الرئيسية
    تميز واعتمد نفسك دوليا
    شهادة معتمدة من جامعة القاهرة
    شهادة معتمدة من الأكاديمية البريطانية جون هيفر John Hever .
    شهادة إتمام البرامج من شركة ميك للاستشارات والتدريب معتمدة دولياً من
    الإتحاد الدولي لمنظمة التدريب والتنمية (IFTDO ) سويسرا .
    مؤسسة التدريب والتعليم المهنى الدولية ( ITOL ) انجلترا .
    للحجز والاشتراك سجل بياناتك اضغط هنا
    http://mec4con.com/ar/reservation.php
    للاستعلام والاستفسار :
    0020224153473 - 0020224153483
    002012282922041 - 00201060211145
    ولمعرفة باقى برامجنا التدريبية وشهادات المهنية زورو موقعنا
    WWW.MEC4CON.COM
    كما يسعدنا تواجدكم على صفحتنا على الفيس بوك
    http://www.facebook.com/mec4con
    او راسلنا على
    s.training@mec4con.com
    marketing@mec4con.net

    ردحذف
  15. موضوع مسيرللغايه

    ردحذف
  16. قصة راااااااائعة وبتحكي عن مشكلة معينة حالية في المجتمع بارك الله فيك ..

    ردحذف

back to top إخبط لفوق